ചാത്തന്നൂരിന് പൊന്മുത്തം

കൊല്ലം: അഞ്ചലിൽ കൗമാര കലാപോരിന് തിരശീല വീണു. അഞ്ച് പകലിരവുകളുടെ കലാമാമാങ്കത്തിൽ ആദ്യദിനം മുതൽ മുന്നോട്ട് പാഞ്ഞ ചാത്തന്നൂരിന്റെ അശ്വമേധത്തെ ആർക്കും പിടിച്ചുകെട്ടാനായില്ല. റവന്യൂ ജില്ലാ സ്കൂൾ കലോത്സവത്തിന്റെ കലാകിരീടത്തിൽ 958 പോയിന്റോടെ ചാത്തന്നൂർ ഉപജില്ല മുത്തമിട്ടു. പോയിന്റുകൾ വാരിക്കൂട്ടി തുടക്കം മുതൽ ഭീഷണിയുയർത്തിയ കരുനാഗപ്പള്ളി ഉപജില്ലയാണ് 947 പോയിന്റുകൾ നേടി രണ്ടാമതെത്തിയത്. 868 പോയിന്റോടെ പുനലൂർ മൂന്നാം സ്ഥാനത്തും 863 പോയിന്റോടെ കൊട്ടാരക്കര നാലാം സ്ഥാനത്തുമെത്തി. അഞ്ചൽ (852), കൊല്ലം (848), വെളിയം (841), കുണ്ടറ (785), ചടയമംഗലം (782), ശാസ്താംകോട്ട (772), ചവറ (753) എന്നീ ക്രമത്തിൽ പിന്നാലെയെത്തി.

കെന്നഡി സ്കൂൾ സൂപ്പർ!

സ്കൂളുകളിൽ കരുനാഗപ്പള്ളി അയണിവേലികുളങ്ങര ജെ.എഫ്.കെ.എം.വി.എച്ച്.എസ്.എസാണ് 300 പോയിന്റുകളുമായി ചാമ്പ്യന്മാരായത്. ആതിഥേയരായ ചാത്തന്നൂർ ഗവ. വെസ്റ്റ് എച്ച്.എസ്.എസ് 243 പോയിന്റുകൾ നേടി രണ്ടാം സ്ഥാനത്തും ശാസ്താംകോട്ട പതാരം എസ്.എം.എച്ച്.എസ് 233 പോയിന്റുകൾ നേടി മൂന്നാം സ്ഥാനത്തുമെത്തി. 206 പോയിന്റുകൾ നേടി വെണ്ടാർ ശ്രീവിദ്യാധിരാജ സ്കൂൾ നാലാമതും 200 പോയിന്റുകൾ നേടി കടയ്ക്കൽ ഗവ.എച്ച്.എസ്.എസ് അഞ്ചാം സ്ഥാനത്തുമെത്തി.