ശെന്തുരുണി വന്യജീവി സങ്കേതത്തിൽ വാരാഘോഷം

തിരുവനന്തപുരം: വന്യജീവി വാരാചരണത്തിന്റെ ഭാഗമായി ശെന്തുരുണി വന്യജീവി സങ്കേതത്തിൽ വിപുലമായ പരിപാടികൾ നടന്നു. ജനപ്രതിനിധികൾ,സ്കൂൾ കോളേജ് വിദ്യാർത്ഥികൾ,പരിസ്ഥിതി പ്രവർത്തകർ,ഇക്കോ ഡെവലപ്പ്മെന്റ് കമ്മിറ്റി അംഗങ്ങൾ,വനംവകുപ്പ് ഉദ്യോഗസ്ഥൻ തുടങ്ങിയവരെ അണിനിരത്തി തെന്മല ടൗണിൽ നിന്നും ആരംഭിച്ച് ഡാം ജംഗ്ഷൻ വരെ വാക്കത്തോൺ നടത്തി. തെന്മല ഗ്രാമപഞ്ചായത്ത് പ്രസിഡന്റ്‌ കെ.ശശിധരൻ ഉദ്‌ഘാടനം ചെയ്തു.ഫോറസ്റ്റ് ഇൻഫർമേഷൻ സെന്ററിൽ ആരംഭിച്ച വന്യജീവി ഫോട്ടോ പ്രദർശനം ഗ്രാമപഞ്ചായത്ത് അംഗം നാഗരാജും ബോധവത്കരണ ക്യാമ്പിന്റെ ഉദ്ഘാടനം വൈൽഡ് ലൈഫ് വാർഡൻ ഹീരലാലും നിർവഹിച്ചു. 8വരെ തെന്മല വിവിധ സ്കൂളുകളിൽ പരിസ്ഥിതി ക്വിസ്,ചിത്രരചന,ഉപന്യാസ പ്രസംഗമത്സരം എന്നിവ നടത്തും. തെന്മലയിലെത്തുന്ന വിനോദസഞ്ചാരികൾക്കായി സ്പോട്ട് ക്വിസ് നടത്തി സമ്മാനങ്ങൾ നൽകും. വനമേഖലകളിൽ പ്രദേശവാസികളുടെയും ഇക്കോ ഡെവലപ്മെന്റ് കമ്മിറ്റികളുടെയും സഹകരണത്തോടെ പ്ലാസ്റ്റിക് മാലിന്യനിർമ്മാർജനം,ജലസ്രോതസുകളുടെ നവീകരണം,വൃക്ഷത്തൈ നടീൽ തുടങ്ങിയവ നടത്തും. വാരാചരണം പ്രമാണിച്ച് 8വരെ പൊതുജനങ്ങൾക്ക് പ്രവേശനം സൗജന്യമായിരിക്കും.