ശൈശവ വിവാഹം , മൂന്ന് കൊല്ലത്തിനിടെ തടഞ്ഞത് 29 എണ്ണം

കോഴിക്കോട്: പൊൻവാക്കിലൂടെ കഴിഞ്ഞ മൂന്ന് വർഷത്തിനിടെ കേരളത്തിൽ തടഞ്ഞത് 29 ശൈശവ വിവാഹങ്ങൾ. 2021 മുതൽ 2024 വരെയുള്ള കണക്കാണിത്. പാരിതോഷികമായി നൽകിയത് 72,500 രൂപ. 2021ലാണ് ശൈശവവിവാഹം തടയാൻ വനിത-ശിശു വികസന വകുപ്പ് പൊതുജന പങ്കാളിത്തത്തോടെ ‘പൊൻവാക്ക്’ ആരംഭിച്ചത്. വിവരം നൽകുന്നവർക്ക് പാ​രി​തോ​ഷി​കമായി 2,500 രൂപ നൽകുന്നതാണ് പദ്ധതി.

2021-22 വർഷത്തിൽ 14ഉം 2022-23 വർഷത്തിൽ പത്തും 2023-24ൽ അഞ്ചും ശൈശവവിവാഹ വിവരങ്ങളാണ് റിപ്പോർട്ട് ചെയ്തത്. കൂടുതൽ കേസുകൾ റിപ്പോർട്ട് ചെയ്തത് മലപ്പുറത്ത്. 11വിവാഹങ്ങളാണ് അവിടെ തടഞ്ഞത്. കോട്ടയം,എറണാകുളം,കണ്ണൂർ,കാസർകോട് ജില്ലകളിൽ ഇതുവരെ കേസുകൾ റിപ്പോർട്ട് ചെയ്തിട്ടില്ല.

ഓരോ വർഷവും കേസുകൾ കുറഞ്ഞുവരികയാണ്. നിയമം കർശനമായതും പരാതിപ്പെടുന്നതും കൂടിയതോടൊണ് കേസുകൾ കുറഞ്ഞതെന്ന് വ​നി​ത-ശി​ശു വി​ക​സ​ന അധികൃതർ വ്യക്തമാക്കി.

രഹസ്യമായിരിക്കും

ശെെശവ വിവാഹത്തെക്കുറിച്ച് വിവരം ലഭിച്ചാൽ ശൈശവവിവാഹ നിരോധന,ജില്ലാ വനിത-ശിശുവികസന ഓഫീസർമാരെ ഫോണിലോ ഇ-മെയിലിലോ അറിയിക്കാം. വി​വ​രം ന​ൽ​കു​ന്നവരുടെ വി​വ​ര​ങ്ങ​ൾ ര​ഹ​സ്യ​മാ​യി സൂ​ക്ഷി​ക്കും. ഒ​ന്നി​ല​ധി​കം പേ​ര്‍ അ​റി​യി​ച്ചാ​ൽ ആ​ദ്യം വി​വ​ര​മ​റി​യി​ച്ച വ്യ​ക്തി​ക്കാ​ണ് പാ​രി​തോ​ഷി​കമുള്ളത്. വി​വ​രങ്ങൾ അ​റി​യി​ക്കേ​ണ്ട ഫോ​ൺ ന​മ്പ​ർ: 94479 47304.

ജില്ല.......................................തടഞ്ഞ വിവാഹങ്ങൾ.............................പാരിതോഷികം

തിരുവനന്തപുരം.............1...........................................................................2,500

കൊല്ലം..................................2...........................................................................5,000

പത്തനംതിട്ട.......................1............................................................................2,500

ആലപ്പുഴ...............................2..........................................................................5,000

ഇടുക്കി..................................3...........................................................................7,500

തൃശൂർ..................................1...........................................................................2,500

പാലക്കാട്............................3...........................................................................7,500

മലപ്പുറം................................11..........................................................................27500

വയനാട്...............................2............................................................................5,000

കോഴിക്കോട്.....................3............................................................................7,500

ഇതുവരെ തടഞ്ഞത്- 29 വിവാഹം

പാരിതോഷികം-72,500

കൂടുതൽ- മലപ്പുറം-11