കണക്കുകൂട്ടൽ തെറ്റിച്ച് ചമ്മണി
തിരഞ്ഞെടുപ്പു കഴിഞ്ഞുള്ള വിശകലനങ്ങളിൽ യു.ഡി.എഫിന്റെ ഷുവർ ബെറ്റുകളിലൊന്നും വൈപ്പിൻ ഉണ്ടായിരുന്നില്ല. മണ്ഡലത്തിന്റെ സമീപകാല ചരിത്രത്തിന് ചുവപ്പായിരുന്നു നിറം. എൽ.ഡി.എഫിന്റെ സ്ഥാനാർത്ഥി നിർണയവും കിടയുറ്റത്. സിറ്റിംഗ് എം.എൽ.എയെ തൃപ്പൂണിത്തുറയ്ക്ക് കൂടുമാറ്റി, ദ്വീപിന് ചിരപരിചിതയായ അഭിഭാഷക എം.ബി. ഷൈനിയെ രംഗത്തിറക്കി. മുൻ മേയറായ ടോണി ചമ്മണി തട്ടകം വിട്ട് വൈപ്പിനിലെത്തിയപ്പോൾ കടുത്ത പോരാട്ടമുണ്ടാകുമെന്നേ എതിർ ക്യാമ്പ് കരുതിയുള്ളൂ. എന്നാൽ, വോട്ടെണ്ണലിൽ ക്രമാനുഗതമായി ലീഡ് വർദ്ധിപ്പിച്ച ടോണി 15,648 വോട്ടിന്റെ ഭൂരിപക്ഷത്തിന് തിരഞ്ഞെടുക്കപ്പെട്ടു.