കടൽ മണൽ ഖനനത്തിനെതിരെ പാർലമെന്റ് മാർച്ച്

ന്യൂഡൽഹി: കടൽ മണൽ ഖനനത്തിനനുമതി നൽകിയ കേന്ദ്രസർക്കാർ നടപടി പിൻവലിക്കണമെന്നാവശ്യപ്പെട്ട് പാർലമെന്റ് മാർച്ച്‌. കേരള ഫിഷറീസ് കോ-ഓർഡിനേഷൻ കമ്മിറ്റിയുടെ ആഭിമുഖ്യത്തിൽ ഇന്നലെ കേരള ഹൗസിൽ നിന്നാരംഭിച്ച മാർച്ചിനെ ഡൽഹി പൊലീസ് ജന്തർ മന്ദറിൽ തടഞ്ഞു. തീരദേശത്തെ വിറ്റുകൊണ്ട് കച്ചവടം നടത്താൻ കേന്ദ്രം തീരുമാനിച്ചാൽ,​ അതു തങ്ങളുടെ ശവത്തിന് മേൽകൂടി ആയിരിക്കുമെന്ന് പ്രതിഷേധം ഉദ്ഘാടനം ചെയ്‌തു കൊണ്ട് എ.ഐ.സി.സി ജനറൽ സെക്രട്ടറി കെ.സി.വേണുഗോപാൽ എം.പി പറഞ്ഞു. ഇടത്-വലത് എം.പിമാർ,​തീരദേശ മണ്ഡലങ്ങളിലെ എം.എൽ.എമാർ,​ മത്സ്യതൊഴിലാളി-ട്രേഡ് യൂണിയൻ സംഘടനാ ഭാരവാഹികൾ തുടങ്ങിയവർ പങ്കെടുത്തു.