ലോക ഹൈപ്പർടെൻഷൻ ദിനാചരണം ബോധവത്കരണവും ബാഡ്മിന്റണും

കാസർകോട്: ലോക ഹൈപ്പർടെൻഷൻ ദിനാചരണത്തിന്റെ ഭാഗമായി ബോധവത്കരണ ക്ലാസും ബാഡ്മിന്റൺ ടൂർണമെന്റും സംഘടിപ്പിച്ചു. ജില്ലാ മെഡിക്കൽ ഓഫീസ് (ആരോഗ്യം), ദേശീയ ആരോഗ്യ ദൗത്യം, പുല്ലൂർ സംസ്കൃതി ക്ലബ്ബ് ബാഡ്മിന്റൺ മോർണിംഗ് ബാച്ച് എന്നിവ സംയുക്തമായി സംഘടിപ്പിച്ച പരിപാടി ഡെപ്യൂട്ടി ജില്ലാ മെഡിക്കൽ ഓഫീസർ ഡോ. അജയ് രാജ് ഉദ്ഘാടനം ചെയ്തു. പുല്ലൂർ പെരിയ സംസ്‌കൃതി ഹാളിൽ സംഘടിപ്പിച്ച പരിപാടിയിൽ സംസ്കൃതി പുല്ലൂർ സെക്രട്ടറി എ.ടി ശശി അധ്യക്ഷത വഹിച്ചു. ടെക്നിക്കൽ അസിസ്റ്റന്റ് ചന്ദ്രൻ എം, പെരിയ സാമൂഹികാരോഗ്യ കേന്ദ്രം ഹെൽത്ത് ഇൻസ്‌പെക്ടർ എം.വി അശോകൻ എന്നിവർ ബോധവത്കരണ ക്ലാസ് നയിച്ചു. ആരോഗ്യ പരിപാലനത്തിൽ വ്യായാമത്തിന്റെ പ്രാധാന്യം ഉയർത്തിക്കാട്ടുന്നതിനായി സംഘടിപ്പിച്ച ഡബിൾ‍സ്‌ ബാഡ്മിന്റൺ ടൂർണമെന്റിൽ ബിനു വണ്ണാർവയലും ഹരിശ്രീ ശശിയും ഉൾപ്പെട്ട ടീം വിന്നറും രതീഷ് മാക്കരംകോട്ടും ഷാരോൺ കിഴക്കുംകരയും ഉൾപ്പെട്ട ടീം റണ്ണറപ്പുമായി. വിജയികൾക്ക് ഡെപ്യൂട്ടി ജില്ലാ മെഡിക്കൽ ഓഫീസർ ഡോ. അജയ് രാജ് ട്രോഫികൾ വിതരണം ചെയ്തു. സംസ്കൃതി പുല്ലൂർ വൈസ് പ്രസിഡണ്ട് വി.വി ബാലകൃഷ്ണൻ, പ്രവീൺ കണ്ണാങ്കോട്ട്, ഇ. ബാലകൃഷ്ണൻ, രാഹുൽ പുളിക്കാൽ, പ്രജിത്ത് ചെമ്മട്ടംവയൽ എന്നിവർ പരിപാടിയിൽ പങ്കെടുത്തു.

ദിനാചരണത്തിന്റെ ഭാഗയമായി കേരള ഗവ: മെഡിക്കൽ ഓഫീസേഴ്സ് അസോസിയേഷന്റെ നേതൃത്വത്തിൽ കാഞങ്ങാട് കെ.ജി.എം.ഓ എ ഹാളിൽ സംഘടിപ്പിച്ച ഹൈപ്പർടെൻഷൻ ബോധവൽക്കരണ പരിപാടിയിൽ ഡെപ്യൂട്ടി ജില്ലാ മെഡിക്കൽ ഓഫീസർ ഡോ. അജയ് രാജ് ക്ലാസ്സെടുത്തു. ചടങ്ങിൽ ഹൈപ്പർടെൻഷൻ സ്ക്രീനിങ്ങും സംഘടിപ്പിച്ചിരുന്നു. എല്ലാ വർഷവും മെയ് 17-നാണ് ലോക ഹൈപ്പർടെൻഷൻ ദിനമായി ആചരിക്കുന്നത്. 'നിശബ്ദ കൊലയാളി' എന്നറിയപ്പെടുന്ന ഉയർന്ന രക്തസമ്മർദ്ദത്തെക്കുറിച്ചുള്ള അവബോധം സമൂഹത്തിൽ സൃഷ്ടിക്കുകയും, കൃത്യമായ പരിശോധനകളിലൂടെ അത് നിയന്ത്രിച്ചു നിർത്തേണ്ടതിന്റെ ആവശ്യകത ജനങ്ങളെ ബോധ്യപ്പെടുത്തുകയുമാണ് ഈ ദിനാചരണം കൊണ്ട് ലക്ഷ്യമിടുന്നത്. ഉയർന്ന രക്തസമ്മർദ്ദം പ്രതിരോധിക്കുന്നതിൽ ആരോഗ്യകരമായ ജീവിതശൈലിക്ക് വലിയ പങ്കുണ്ട്. ദിനചര്യയിൽ ചിട്ടയായ വ്യായാമം ഉൾപ്പെടുത്തുക, ഭക്ഷണത്തിൽ ഉപ്പിന്റെയും കൊഴുപ്പിന്റെയും ഉപയോഗം കുറയ്ക്കുക എന്നിവ ഇതിൽ വളരെ പ്രധാനമാണ്.

ബൈറ്റ്

ദൈനംദിന ജീവിതത്തിലെ മാനസിക സമ്മർദ്ദം നിയന്ത്രിക്കുന്നതിനും, ദിവസവും കൃത്യമായ ഉറക്കം ഉറപ്പാക്കുന്നതിനും നാം പ്രത്യേകം ശ്രദ്ധിക്കേണ്ടതുണ്ട്. മരുന്നുകൾക്കൊപ്പം തന്നെ ഇത്തരം ആരോഗ്യകരമായ ശീലങ്ങളും പിന്തുടരുന്നത് ഹൈപ്പർടെൻഷൻ അകറ്റി നിർത്താനും കൂടുതൽ കാലം ആരോഗ്യമുള്ള ജീവിതം നയിക്കാനും ഏവരെയും സഹായിക്കും. ദിനാചരണത്തിന്റെ ഭാഗമായി ജില്ലയിലെ സർക്കാർ ആരോഗ്യ സ്ഥാപനങ്ങളിൽ വിവിധ ബോധവൽക്കരണ പരിപാടികൾ സംഘടിപ്പിക്കും.

ഡോ. ബി. സന്തോഷ്

(ജില്ലാ മെഡിക്കൽ ഓഫിസർ)