'ജില്ലാ പഞ്ചായത്ത് ' വിജ്ഞാനീയം പ്രകാശനം ചെയ്തു
പത്തനംതിട്ട : ചരിത്രം വളച്ചൊടിച്ച് ഒറ്റുകാരെ വീരനായകരാക്കുമ്പോൾ യഥാർത്ഥ വീരനായകൻമാർ തമസ്കരിക്കപ്പെടുമെന്ന് മന്ത്രി എം.ബി.രാജേഷ്. പത്തനംതിട്ട ജില്ലാ പഞ്ചായത്ത് പദ്ധതിയിൽ പുറത്തിറക്കിയ വിജ്ഞാനീയം ഗ്രന്ഥത്തിന്റെ പ്രകാശനം നിർവഹിക്കുകയായിരുന്നു അദ്ദേഹം. ചരിത്രത്തെ രാഷ്ട്രീയ ആയുധമാക്കുന്നതിനോടു യോജിക്കാനാകില്ല. ശരിയായ ചരിത്രം കണ്ടെത്തണം. ചരിത്രം സൃഷ്ടിക്കുന്നത് സാധാരണക്കാരായ മനുഷ്യരാണ്. അവരുടെ ഓരോവാക്കിനും ചരിത്രത്തിൽ വിലയുണ്ടെന്നും മന്ത്രി പറഞ്ഞു. പ്രതിസന്ധികളെ നേരിടാനുള്ള കഴിവും മുന്നേറാനുള്ള ഊർജവും ചരിത്രാവബോധത്തിലൂടെയുണ്ടാകുമെന്നും അദ്ദേഹം ചൂണ്ടിക്കാട്ടി. ജില്ലാ പഞ്ചായത്ത് പ്രസിഡന്റ് ജോർജ് ഏബ്രഹാം അദ്ധ്യക്ഷതവഹിച്ചു. മുൻ പ്രസിഡന്റും വിജ്ഞാനീയം എഡിറ്ററുമായ ഓമല്ലൂർ ശങ്കരൻ ആമുഖപ്രഭാഷണം നടത്തി. പത്തനംതിട്ട നഗരസഭ ചെയർമാൻ ടി.സക്കീർ ഹുസൈൻ, മുൻ എം.എൽ.എ രാജു ഏബ്രഹാം, ഡോ.എഴുമറ്റൂർ രാജരാജവർമ, ഡോ.അലക്സാണ്ടർ ജേക്കബ്, ഡോ.വർഗീസ് ജോർജ്, ഫാ.ഡോ.തോമസ് കുഴിനാപ്പുറത്ത്, ജില്ലാ പഞ്ചായത്ത് വൈസ് പ്രസിഡന്റ് ബീനാ പ്രഭ, സ്റ്റാൻഡിംഗ് കമ്മിറ്റി അദ്ധ്യക്ഷരായ ആർ. അജയകുമാർ, ജിജി മാത്യു, സി.കെ.ലതാ കുമാരി, മുൻ പ്രസിഡന്റ് രാജി പി.രാജപ്പൻ, അംഗങ്ങൾ, രാജു നെടുവംപുറം, ഷാഹുൽ ഹമീദ്, നിസാർ നൂർമഹൽ, മുഹമ്മദ് സാലി തുടങ്ങിയവർ സംസാരിച്ചു.