ഫേസ്ബുക്ക് പോസ്റ്റുമായി ബിനീഷ് കോടിയേരി

കണ്ണൂർ: തിരഞ്ഞെടുപ്പിൽ എൽ.ഡി.എഫ് പരാജയപ്പെട്ടതിനു പിന്നാലെ ഫേസ്ബുക്ക് പോസ്റ്റുമായി സി.പി.എം മുൻ സംസ്ഥാന സെക്രട്ടറി കോടിയേരി ബാലകൃഷ്ണന്റെ മകൻ ബിനീഷ് കോടിയേരി. 'പാർട്ടിക്ക് പിണറായിയെ പോലൊരു മുഖ്യമന്ത്രിയെ കിട്ടിയേക്കാം, പക്ഷേ,​ കോടിയേരിയെ പോലൊരു പാർട്ടി സെക്രട്ടറിയെ കിട്ടില്ല. ചില നഷ്ടങ്ങൾ നികത്താനാവില്ല' എന്ന് സഖാക്കൾ പങ്കുവയ്ക്കുന്ന വാചകം ഉദ്ധരിച്ചുകൊണ്ടാണ് ഫേസ്ബുക്ക് പോസ്റ്റ് ആരംഭിക്കുന്നത്.

തിരഞ്ഞെടുപ്പ് പരാജയം പാർട്ടിക്കെതിരെയുള്ള ജനവിധിയായി കാണരുതെന്നും വ്യക്തികേന്ദ്രീകൃതമായ നിലപാടുകൾക്കെതിരെ ഉള്ളതാണ് ഈ വിധിയെന്നും വ്യക്തമാക്കി. ഞാൻ എല്ലാത്തിനും വലുതാണ് എന്ന ചിന്ത ആധുനിക സമൂഹത്തിൽ ആർക്കും ഭൂഷണമല്ല,​ ജനവിധി വിനയത്തോടെ അംഗീകരിച്ച് മുന്നോട്ട് പോകണം.കമ്മ്യൂണിസ്റ്റ് പാർട്ടി രീതി ഒരു തിരഞ്ഞെടുപ്പ് ഫലത്തിൽ ഒതുങ്ങുന്നതല്ല. അനീതിക്കും ചൂഷണത്തിനുമെതിരായ നിരന്തര പോരാട്ടമാണ് കമ്മ്യൂണിസ്റ്റുകാരന്റെ ദൗത്യം. ജനങ്ങൾക്കൊപ്പം നിന്ന് തെറ്റുകൾ തിരുത്തി തിരിച്ചു വരുമെന്നും വ്യക്തമാക്കി.