അമ്മ ചക്ക മുറിക്കുന്നതിനിടെ കാൽവഴുതി കത്തിയുടെ മുകളിലേയ്ക്ക് വീണു, എട്ടുവയസുകാരന് ദാരുണാന്ത്യം

കാസർകോട്: അമ്മ ചക്ക മുറിക്കുന്നതിനിടെ കത്തിയുടെ മുകളിലേയ്ക്ക് വീണ് എട്ടുവയസുകാരന് ദാരുണാന്ത്യം. കാസർകോട് പാടി ബെള്ളൂറടുക്ക സ്വദേശി സുലേഖയുടെ മകൻ ഹുസൈൻ ഷഹബാസ് ആണ് മരിച്ചത്. ഇന്നലെ രാത്രിയായിരുന്നു സംഭവം.

കളിക്കുന്നതിനിടെ കുട്ടി കാൽവഴുതി ചക്ക മുറിക്കുകയായിരുന്ന കത്തിക്ക് മുകളിൽ വീഴുകയായിരുന്നുവെന്നാണ് വിവരം. പലകയിൽ ഘടിപ്പിക്കുന്ന പ്രത്യേകതരം കത്തി ഉപയോഗിച്ചാണ് കാസർകോട് ഭാഗത്ത് ചക്ക മുറിക്കാറുള്ളത്. ഈ കത്തിയിലേയ്ക്ക് കുട്ടി വീഴുകയായിരുന്നു. വീഴ്‌ചയിൽ കുട്ടിയുടെ നെഞ്ചിന്റെ ഭാഗത്തായി ആഴത്തിലുള്ള മുറിവേറ്റു.

ഉടൻതന്നെ കുട്ടിയെ കാസർകോട്ടെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംഭവത്തിൽ ദുരൂഹത ഇല്ലെന്ന് പൊലീസ് വ്യക്തമാക്കി. ഇന്നുതന്നെ ഇൻക്വസ്റ്റ് നടപടികൾ പൂർത്തിയാക്കി മൃതദേഹം ബന്ധുക്കൾക്ക് വിട്ടുനൽകുമെന്നാണ് വിവരം.