ജല ദുരുപയോഗത്തിനെതിരെ വാട്ടർ അതോറിട്ടി, വേനലാണ്, കുടിവെള്ളം 'കലക്കു'ന്ന കളി​വേണ്ട!

ആലപ്പുഴ: വേനൽ കടുത്തതോടെ കുടിവെള്ളത്തിന്റെ ദുരുപയോഗം തടയാൻ കർശന നടപടികളുമായി വാട്ടർ അതോറിട്ടി രംഗത്ത്. കുടിവെള്ള ബില്ല് അടയ്ക്കാത്തവരുടെ കണക്ഷൻ വിച്ഛേദിക്കാൻ അസിസ്റ്റന്റ് എൻജിനീയർമാരുടെ നേതൃത്വത്തിലുള്ള സംഘം ജില്ലയിൽ പരിശോധന നടത്തും.

ആന്റി തെഫ്റ്റ് സ്‌ക്വാഡിന് പുറമേ സബ്‌ സ്റ്റേഷനുകളിൽ നിന്ന് നേരിട്ടും പരിശോധന നടത്തുന്നുണ്ട്. കുടിവെള്ള മോഷണത്തിനും ചൂഷണത്തിനും വൻതുക പിഴയീടാക്കാൻ കഴിയും. പിഴ അടച്ചില്ലെങ്കിൽ ജയിൽ ശിക്ഷവരെ നൽകാനുള്ള നടപടി സ്വീകരിക്കാം. അനധികൃതമായി വാട്ടർ അതോറിട്ടി ലൈനിൽ നിന്ന് കണക്ഷൻ എടുക്കുക, മീറ്റർ ഇല്ലാതെ കുടിവെള്ളം ഉപയോഗിക്കുക എന്നിവ ജലമോഷണമായാണ് കണക്കാക്കുന്നത്. കുറ്റം കണ്ടുപിടിച്ചാൽ പിഴ ചുമത്തി നോട്ടീസ് നൽകും. നിശ്ചിത സമയത്തിനുള്ളിൽ പിഴ അടയ്ക്കാത്ത പക്ഷം വീണ്ടുമൊരു കത്തയയ്ക്കും. രണ്ടാഴ്ച കഴിഞ്ഞിട്ടും പിഴ അടച്ചില്ലെങ്കിൽ കേസ് പൊലീസിന് കൈമാറും. തുടർന്ന് അറസ്റ്റ് ചെയ്ത് കോടതിയിൽ ഹാജരാക്കും. ആലപ്പുഴ നഗരസഭ, കുട്ടനാട്, അപ്പർകുട്ടനാട്, കാർത്തികപ്പള്ളി താലൂക്ക് മേഖലയിലാണ് കുടിവെള്ളക്ഷാമം അതിരൂക്ഷം.

# ഇതൊക്കെ ശ്രദ്ധിക്കണം

* ചെടി നനയ്ക്കലും വാഹനം കഴുകലും ശുദ്ധജലം ഉപയോഗിച്ച് വേണ്ട
* ക്ളോറിനേറ്റ് ചെയ്ത കുടിവെള്ളം ദുരുപയോഗം ചെയ്യരുത്
* വീടിന് പുറത്തെ ആവശ്യങ്ങൾക്ക് വാട്ടർ അതോറിട്ടിയുടെ വെള്ളം ഒഴിവാക്കണം

* കുടിവെള്ളം മറ്റ് ആവശ്യങ്ങൾക്ക് ഉപയോഗിക്കുന്നത് കുറ്റകരം

.................................

# പിഴ: 10,000 മുതൽ 25,000 രൂപവ രെ, അല്ലെങ്കിൽ ആറുമാസം തടവ്, അല്ലെങ്കിൽ രണ്ടും കൂടി

...................................

# അവർക്ക് എന്തുമാവാം!

വേനൽക്കാലത്ത് കുടിവെള്ളം ദുരുപയോഗം ചെയ്യുന്നവരെ പിടികൂടാൻ മുൻകൈയെടുക്കുന്ന വാട്ടർ അതോറിട്ടി തങ്ങളുടെ വീഴ്ച കൊണ്ട് വെള്ളം പാഴാകുന്നത് തടയാൻ ഒരു നടപടിയും സ്വീകരിക്കുന്നില്ല. വകുപ്പ് സ്ഥാപിച്ച പൈപ്പുകൾ പൊട്ടി ലക്ഷക്കണക്കിന് ലിറ്റർ വെള്ളമാണ് പല സ്ഥലങ്ങളിലായി ദിവസവും പാഴാകുന്നത്. ഒട്ടുമിക്കയിടത്തും ദിവസങ്ങളോളം വെള്ളം പാഴായ ശേഷമാണ് ചോർച്ച അടയ്ക്കുന്നത്.

ജനങ്ങൾ ബോധവാന്മാരായാൽ മാത്രമേ കുടിവെള്ള ക്ഷാമം പരിഹരിക്കാനാവൂ. ഒരാൾ രണ്ട് ലിറ്റർ വെള്ളം പാഴാക്കാതിരുന്നാൽ പ്രതിദിനം ലക്ഷക്കണക്കിന് ലിറ്റർ വെള്ളം ജില്ലയിൽ കരുതലായി ശേഖരിക്കാൻ കഴിയും. ഇതിന് തദ്ദേശ സ്വയംഭരണ സ്ഥാപനങ്ങളും ജലഅതോറിട്ടിയും ആവശ്യമായ പ്രചാരണം നടത്തണം

അഡ്വ. എസ്.ജ്യോതികുമാർ, പരിസ്ഥിതി പ്രവർത്തകൻ

വെള്ളക്കരം കുടിശ്ശിക വരുത്തിയവരെ കണ്ടെത്താനും കണക്ഷൻ വിച്ഛേദിക്കാനും നിയമിച്ചിട്ടുള്ള അസിസ്റ്റന്റ് എൻജിനീയർമാരുടെ നേതൃത്വത്തിലുള്ള സംഘം കുടിവെള്ളം ചൂഷണം ചെയ്യുന്നവർക്കെതിരെ നടപടി സ്വീകരിക്കും

എക്സിക്യുട്ടീവ് എൻജിനീയർ, ജലഅതോറിട്ടി, ആലപ്പുഴ