ശ്രീജിത്തിന്റെ സിനിമാക്കമ്പം അയർലൻഡ് 'ദത്തെടുത്തു'

കൊച്ചി: അറിയപ്പെടുന്ന തിരക്കഥാകൃത്താകണമെന്ന ആഗ്രഹം കൈവി​ട്ടാണ് ചെങ്ങന്നൂർ സ്വദേശി ശ്രീജിത്ത് ശ്രീകുമാർ ഉപരിപഠനവും ജോലിയുംതേടി അയർലൻഡിലേക്ക് പറന്നത്. എന്നാൽ ഈ 29കാരന് ലോകസിനിമയിലേക്കുള്ള വാതി​ൽ തുറന്നുനൽകി​ അവി​ടുത്തെ ബെൽഫാസ്റ്റ് പട്ടണം. 'അഡോപ്ഷൻ" എന്ന ശ്രീജി​ത്തി​ന്റെ കഥ ബെൽഫാസ്റ്റ്​ ഫിലിം ക്ലബിലെ അംഗങ്ങൾ ചേർന്ന് ഹ്രസ്വചിത്രമാക്കി​.

'അഡോപ്ഷൻ" ലോകശ്രദ്ധനേടുകയാണിപ്പോൾ. ഇന്ത്യക്കാരനായ റോണക് കപൂർ സംവിധാനം ചെയ്ത ഷോർട്ട്ഫിലി​മിലെ അഭിനേതാക്കളെല്ലാം ഐറിഷ് വംശജരാണ്. അടൂർ ഐ.എച്ച്.ആർ.ഡി കോളേജിൽ മെക്കാനിക്കൽ എൻജിനിയറിംഗിന് പഠിക്കുമ്പോൾ ശിവരാത്രി, ബന്ധനം എന്ന രണ്ട് കഥകൾ എഴുതിയെങ്കി​ലും സംവിധായകനെയോ നടന്മാരെയോ കേൾപ്പിക്കാനോ പ്രസിദ്ധീകരിക്കാനോ ശ്രീജി​ത്തി​ന് കഴിഞ്ഞില്ല. ശിവരാത്രി പിന്നീട് ഷോർട്ട്ഫിലിമാക്കിയെങ്കിലും മുന്നോട്ടുപോക്ക് പ്രതിസന്ധിയായി.

സിനിമാമോഹത്തിന് അത്ര പിന്തുണ വീട്ടിൽനിന്ന് ലഭിക്കാതെവന്നതോടെ സഹോദരൻ ശ്രീഹരിയുടെ പാത പിന്തുടർന്നാണ് അയർലൻഡിലേക്ക് പറന്നത്.

സി​നി​മാപ്രേമികളുടെ കൂട്ടായ്മകൾ അയർലാൻഡിൽ ഒരുപാടുണ്ടെന്ന് അറിഞ്ഞപ്പോൾ മനസിൽ വീണ്ടും മോഹം മുളപൊട്ടി. ഡെൽഫാറ്റി ഫിലിംക്ലബിൽ അംഗത്വമെടുത്തു. ജൂനിയർ ആർട്ടിസ്റ്റായി ക്ലബിന്റെ പ്രവർത്തനങ്ങളിൽ ഭാഗമായി. കഥപറഞ്ഞപ്പോൾ ഷോർട്ട്ഫിലിം നിർമ്മിക്കാൻ എല്ലാവരും ഒപ്പംനി​ന്നു.

ശ്രീവിഹാറിൽ ആർ. ശ്രീകുമാർ, അജിതകുമാരി എന്നിവരാണ് ശ്രീജിത്തിന്റെ മാതാപിതാക്കൾ.

ചിത്രീകരണം

6 ദിവസം കൊണ്ട്

ഒരു മാസംകൊണ്ട് കഥ പൂർത്തിയാക്കി. ചിത്രീകരണത്തിന് വേണ്ടിവന്നത് ആറുദിവസം മാത്രം. കൂട്ടായ്മയിലെ അംഗങ്ങളും അവരുടെ മക്കളും അഭിനേതാക്കളായപ്പോൾ ചെലവായത് ക്യാമറയുടെ വാടകമാത്രം. ലണ്ടൻ ഗ്ലോബൽ, ലണ്ടൻ ലിഫ്‌റ്റോഫ്, ബ്രിട്ടീഷ് ഇന്റർനാഷണൽ, നാസു ഫിലിം ഫെസ്റ്റിവലുകളി​ൽ എൻട്രി​യായ അഡോപ്ഷന് മൂന്ന് പുരസ്‌കാരങ്ങളും ലഭിച്ചു.

മാതൃത്വം നേടിയെടുക്കാനുള്ള അമ്മയുടെ തോറ്റുപോയ പോരാട്ടത്തി​ന്റെ കഥയാണ് അഡോപ്ഷൻ. നിയമപരമായി ദത്തെടുക്കേണ്ടതിന്റെ പ്രാധാന്യം ചിത്രം പറഞ്ഞുവയ്ക്കുന്നു. അഡോപ്ഷന് വലിയ പിന്തുണയാണ് ലഭിച്ചത്. ഇത് മലയാള സിനിമയിലേക്കും അവസരമൊരുക്കി. ഒരു കഥ വൈകാതെ സിനിമയാകും.

ശ്രീജിത്ത് ശ്രീകുമാർ