തോക്കുചൂണ്ടി കാറും ഡ്രൈവറേയും തട്ടിക്കൊണ്ടുപോയ കേസിൽ ഒരാൾകൂടി അറസ്റ്റിൽ

ആലുവ: ദേശീയപാതയിൽ തോക്കുചൂണ്ടി കാറും ഡ്രൈവറേയും തട്ടിക്കൊണ്ടുപോയ കേസിൽ ഒരാൾകൂടി അറസ്റ്റിൽ. മണ്ണാർക്കാട് കാഞ്ഞിരംകുന്നം കച്ചേരിപ്പറമ്പ് ചെറുമലയിൽ വീട്ടിൽ മുഹമ്മദ് മുഹ്‌സിനെയാണ് (28) ആലുവ പൊലീസ് അറസ്റ്റുചെയ്തത്. അഞ്ചാം പ്രതിയാണ് ഇയാൾ. ഇതോടെ സംഭവത്തിൽ നേരിട്ട് പങ്കെടുത്തവരും സഹായിച്ചവരും ഉൾപ്പെടെ 13 പേർ അറസ്റ്റിലായി.

മാർച്ച് 31ന് കമ്പനിപ്പടി ഭാഗത്തായിരുന്നു സംഭവം. തനിക്ക് കൊണ്ടുവന്ന ഹാൻസ് തട്ടിയെടുക്കാൻ മുഖ്യപ്രതിയായ മുജീബ് ക്വട്ടേഷൻ കൊടുക്കുകയായിരുന്നു. കാറും ഹാൻസും തട്ടിയെടുത്ത് മറിച്ച് വിൽക്കുകയായിരുന്നു ലക്ഷ്യം. നെടുമ്പാശേരി സ്റ്റേഷനിൽ ഇയാൾക്കെതിരെ സമാന സ്വഭാവമുള്ള കേസുണ്ട്. ഇൻസ്‌പെക്ടർ എൽ. അനിൽകുമാർ, എസ്.ഐമാരായ സി.ആർ. ഹരിദാസ്, വി.എൽ. ആനന്ദ്, കെ.പി. ജോണി സി.പി.ഒമാരായ മാഹിൻ ഷാ അബൂബക്കർ, മുഹമ്മദ് അമീർ , എച്ച്. ഹാരിസ്, കെ.എം. മനോജ് തുടങ്ങിയവരാണ് അന്വേഷണ സംഘത്തിലുണ്ടായിരുന്നത്. പ്രതിയെ റിമാൻഡ് ചെയ്തു.