നന്മണ്ട: ഇരുകാലുകളും തളർന്നുപോയ ഈ ഇരട്ട സഹോദരങ്ങൾ ഇഴഞ്ഞുനീങ്ങുന്നത് കുടുംബം പുലർത്താനാണ്.

പടിഞ്ഞാറെക്കുഴി ബാലന്റെയും ബാബുവിന്റെയും ദുരിതയാത്രയ്ക്ക് വർഷങ്ങളുടെ പഴക്കമുണ്ട്. നന്മണ്ട ഗ്രാമപഞ്ചായത്തിൽ 11-ാം വാർഡിലെ സ്ഥിര താമസക്കാരായ ഈ അറുപതുകാർക്ക് ജോലിക്ക് പോകാനും തിരിച്ചുവരാനും വീട്ടിനടുത്തുള്ള ഈ വഴി മാത്രമേയുള്ളൂ. മഴയിൽ കുത്തിയൊലിച്ചുപോയ പാറച്ചാലിൽ മീത്തൽറോഡ് ഏറെ വർഷങ്ങളായി കല്ലും മണ്ണും കുഴിയുമായി കിടക്കുകയാണ്. നേരത്തെ ഇരുചക്രവാഹനത്തിന്റെ പിന്നിൽ കയറി ഈ റോഡിൽ ബാബു വീണത് നാല് തവണയാണ്. സ്വാധീനമുള്ള ഇടതുകൈയ്ക്ക് പരിക്കുപറ്റി കുറച്ചുനാൾ കിടപ്പിലായിരുന്നു. ഇതോടെ കൈ കുത്തി നടക്കാനും പ്രയാസമായി.

2010 നവം.16 നാണ് ഈ റോഡ് നിർമ്മിച്ചത്. അതിനുശേഷം ഓരോ ഭരണസമിതി വരുമ്പോഴും റോഡ് ഗതാഗതയോഗ്യമാക്കണമെന്ന് നാട്ടുകാർ ആവശ്യപ്പെടാറുണ്ടെങ്കിലും ഇതുവരെയും പരിഗണിക്കപ്പെട്ടില്ല. ഈ റോഡിൽ നിന്നും

ബാബുവിന്റെ വീട്ടിലേയ്ക്ക് 250 മീറ്ററും ബാലന്റെ വീട്ടിലേയ്ക്ക് 350 മീറ്ററുമാണ് ദൂരം. മാനുഷിക പരിഗണന വെച്ചും ഇരുവരുടെയും ശാരീരിക അവശതകൾ മനസിലാക്കിയെങ്കിലും എത്രയും പെട്ടെന്ന് കോൺക്രീറ്റ് ചെയ്യണമെന്നാണ് നാട്ടുകാരുടെ ആവശ്യം. കഴിഞ്ഞ ഭരണ സമിതി ഈ റോഡിന് ഫണ്ട് അനുവദിച്ചിരുന്നു. ആ തുക വിനിയോഗിച്ച് ഈ ഭരണസമിതി റോഡിന്റെ മറുതലയ്ക്കൽ 130 മീറ്റർ റോഡ് കോൺക്രീറ്റ് ചെയ്തെങ്കിലും ബാലനും ബാബുവും സ്ഥിരമായി സഞ്ചരിക്കുന്ന ഭാഗം പരിഗണിച്ചില്ല. ഇത്തവണ ഈ ഭാഗത്തെ പ്രവൃത്തി നടത്തുമെന്ന വാർഡ് മെമ്പറുടെ ഉറപ്പിൽ പ്രതീക്ഷയർപ്പിച്ചിരിക്കുകയാണ് ഇരുവരും.

ഒന്നര വയസുള്ളപ്പോൾ പനി പിടിപെട്ടപ്പോഴാണ് കാലുകൾ തളർന്നുപോവുകയും ബാബുവിന്റെ വലതുകൈക്ക് സ്വാധീനം

നഷ്ടപ്പെടുകയുമായിരുന്നു. എങ്കിലും രണ്ടുപേരും വിധിയെ പഴിച്ച് വീട്ടിലിരുന്നില്ല. ജീവിതത്തിന്റെ രണ്ടറ്റവും കൂട്ടിമുട്ടിക്കാൻ നിത്യേന ജോലിക്ക് പോകുന്ന ഈ കഠിനാദ്ധ്വാനികൾ ശരീരിക വൈകല്യത്തെ ഒരു പ്രശ്നമായി കണ്ടതേയില്ല. ബാലൻ കിണർ കുഴിക്കുന്നതിലും കിണറിലെ പാറ പൊട്ടിക്കുന്നതിലും വിദഗ്ദ്ധനായിരുന്നു. പുര കെട്ടി മേയാനും പോകും. ഇപ്പോൾ നന്മണ്ടയിലെ ഒരു വെളിച്ചെണ്ണ മില്ലിൽ ജോലി നോക്കുകയാണ്. ബാബു നന്മണ്ട - നരിക്കുനി മൂലേം മാവിനു ചുവട്ടിൽ പെട്ടിക്കട നടത്തിവരുന്നു.

പാറച്ചാലിൽ മീത്തൽ തെക്കയിൽ റോഡിന്റെ ഈ ഭാഗത്തെ പ്രവൃത്തിയ്ക്കായി 5 ലക്ഷം രൂപ വകയിരുത്തിയിട്ടുണ്ട്. 105 മീറ്റർ റോഡ് തൊഴിലുറപ്പ് പദ്ധതിയിലൂടെ കോൺക്രീറ്റ് ചെയ്യും.

കണ്ടിക്കുന്നുമ്മൽ ബിജിത

പതിനൊന്നാം വാർഡ് മെമ്പർ

നന്മണ്ട ഗ്രാമപഞ്ചായത്ത്