പ്രതീക്ഷകളും നിർദ്ദേശങ്ങളും പങ്കുവച്ച് വീട്ടുകാർ: ബിനോയ് വിശ്വത്തിന്റെ നേതൃത്വത്തിൽ ഭവന സന്ദർശനം

കോഴിക്കോട്: സി.പി.ഐ നേതൃത്വത്തിൽ സംസ്ഥാന വ്യാപകമായി നടക്കുന്ന ഭവന സന്ദർശന പരിപാടിയുടെ ഭാഗമായി കോഴിക്കോട് നഗരത്തിലെത്തിയ സി.പി.ഐ സംസ്ഥാന സെക്രട്ടറി ബിനോയ് വിശ്വം ഗൃഹസമ്പർക്കം നടത്തി. നേതാക്കൾക്കൊപ്പം നഗരത്തിലെ നിരവധി വീടുകളിൽ ബിനോയ് വിശ്വമെത്തി വീട്ടുകാരുമായി സംവദിച്ചു. വീടുകളിൽ നിന്ന് മികച്ച പ്രതികരണമാണ് ലഭിച്ചതെന്നും ഇടതുപക്ഷം മൂന്നാമതും അധികാരത്തിൽ വരണമെന്നാണ് ജനങ്ങൾ ആഗ്രഹിക്കുന്നതെന്ന് ബോധ്യമായെന്നും ഭവന സന്ദർശനത്തിനിടെ അദ്ദേഹം മാദ്ധ്യമ പ്രവർത്തകരോട് പറഞ്ഞു.

ജില്ലയിലെ മുഴുവൻ ബ്രാഞ്ച് പരിധിയിലും പാർട്ടി സംസ്ഥാന-ജില്ലാ നേതൃ നിരയിലെ ആളുകൾ മുതൽ ബ്രാഞ്ച് അംഗങ്ങൾ വരെ പങ്കെടുത്തുകൊണ്ട് ഈ മാസം 10 വരെയാണ് ഭവന സന്ദർശന പരിപാടി നടക്കുന്നത്. സർക്കാറിന്റെ പ്രവർത്തനങ്ങളെ സംബന്ധിച്ച് ജനങ്ങൾക്ക് കൃത്യമായ ബോധ്യമുണ്ടെന്നും വിലപ്പെട്ട നിർദ്ദേശങ്ങളും സർക്കാറിലുള്ള പ്രതീക്ഷകളും അവർ പങ്കുവെച്ചെന്നും ബിനോയ് വിശ്വം പറഞ്ഞു. സി.പി.ഐ ജില്ലാ സെക്രട്ടറി അഡ്വ. പി ഗവാസ്, നേതാക്കളായ പി.കെ നാസർ, ഇ.സി സതീശൻ, പി അസീസ് ബാബു, അഡ്വ. സാറ ജാഫർ, കെ സുജിത്ത്, പി ശ്രീജിത്ത് എരഞ്ഞിക്കൽ എന്നിവരും ബിനോയ് വിശ്വത്തോടൊപ്പമുണ്ടായിരുന്നു.