വിജ്ഞാന പത്തനംതിട്ട : നൈപുണി പരിശീലനം നാളെ

കോഴഞ്ചേരി : വിജ്ഞാന പത്തനംതിട്ടയുടെ രണ്ടാംഘട്ട പരിപാടിയായ നൈപുണി പരിശീലന പദ്ധതി നാളെ രാവിലെ 10ന് കോഴഞ്ചേരി സെന്റ് തോമസ് കോളേജിൽ എം.ജി യൂണിവേഴ്സിറ്റി വൈസ് ചാൻസിലർ ഡോ.സി.ടി​.അരവിന്ദകുമാർ ഉദ്ഘാടനം ചെയ്യും. പ്രിൻസിപ്പൽ ഡോ.ജോർജ് കെ അലക്സ് അദ്ധ്യക്ഷത വഹിക്കും. വിജ്ഞാനകേരളം മുഖ്യ ഉപദേഷ്ടാവ് ഡോ.ടി.എം.തോമസ് ഐസക് മുഖ്യപ്രഭാഷണം നിർവഹിക്കും. യൂണിവേഴ്സിറ്റി സിന്റിക്കേറ്റ് അംഗങ്ങളായ ഡോ.എ.എസ്.സുമേഷ്, അഡ്വ.പി.ബി.സതീഷ്‌കുമാർ പദ്ധതി​ വിശദീകരിക്കും. വിജ്ഞാന പത്തനംതിട്ട രക്ഷാധികാരികളായ എ.പദ്മകുമാർ , കെ.സി.രാജഗോപാലൻ എന്നിവർ പങ്കെടുക്കും. കെ-ഡിസ്ക് മെമ്പർ സെക്രട്ടറി ഡോ.പി.വി.ഉണ്ണികൃഷ്ണൻ , നോളേജ് മിഷൻ ഡയറക്ടർ റിയാസ് എന്നിവരുടെ നേതൃത്വത്തിൽ ജില്ലയിലെ വിവിധ ഉന്നത വിദ്യാഭ്യാസ സ്ഥാപനങ്ങളിൽ നിന്നുള്ള പ്രിൻസിപ്പൽമാർ, ഐ ക്യു എ സി കോർഡിനേറ്റർമാർ, സ്കിൽ സെന്റർ കോർഡിനേറ്റർമാർ, അദ്ധ്യാപകർ എന്നിവർ പങ്കെടുക്കുന്ന ശില്പശാലയും സംഘടിപ്പിച്ചിട്ടുണ്ട്. ജില്ലയിലെ ആർട്സ് ആൻഡ് സയൻസ്, എൻജിനീയറിംഗ്, ഐ ടി ഐ, പോളിടെക്നിക്കുകൾ, മെഡിക്കൽ ആൻഡ് പാരാമെഡിക്കൽ കോളേജുകൾ എന്നീ മേഖകളിലുള്ള മുഴുവൻ വിദ്യാർത്ഥികളെയും അദ്ധ്യാപകരെയും അണിചേർത്തു കൊണ്ടുള്ള നൈപുണി പരിശീലന പരിപാടികളാണ് ആസൂത്രണം ചെയ്തിരിക്കുന്നത്. കേരള സർക്കാരിന്റെയും കെ - ഡിസ്ക്കിന്റെയും കേരള നോളജ് ഇക്കോണമി മിഷന്റെയും നേതൃത്വത്തിൽ യൂണിവേഴ്സിറ്റികളുടെയും സാങ്കേതിക സർവ്വകലാശാലയുടെയും ആരോഗ്യ സർവകലാശാലയുടെയും കീഴിൽ പ്രവർത്തിക്കുന്ന എല്ലാ സ്ഥാപനങ്ങളെയും നൈപുണി പരിശീലന പദ്ധതിയുടെ ഭാഗമാക്കുകയാണ്.