ആറ്റുകാൽ പൊങ്കാല; മേയറുടെ അദ്ധ്യക്ഷതയിൽ യോഗം ചേർന്നു

തിരുവനന്തപുരം:ആറ്റുകാൽ പൊങ്കാല മഹോത്സവത്തിന്റെ ക്രമീകരണങ്ങൾ ചർച്ചചെയ്യുന്നതിന് മേയർ ആര്യ രാജേന്ദ്രന്റെ അദ്ധ്യക്ഷതയിൽ യോഗം ചേർന്നു. ഉത്സവത്തിന്റെ ഭാഗമായി നഗരസഭ വിവിധ വകുപ്പുകളുടെ സഹകരണത്തോടെ, ഏർപ്പെടുത്തേണ്ട ക്രമീകരണങ്ങളെ സംബന്ധിച്ചാണ് ചർച്ച നടന്നത്. എല്ലാവർഷത്തെയുംപോലെ ഗ്രീൻ പ്രോട്ടോക്കോൾ പാലിച്ച് ഉത്സവം നടത്തും.ഉത്സവ ഒരുക്കങ്ങളുടെ ഭാഗമായി റോഡുകളുടെ അറ്റകുറ്റപ്പണികൾ തീർക്കുക,ഓടകൾ വൃത്തിയാക്കുക,സ്ട്രീറ്റ് ലൈറ്റുകൾ ക്രമീകരിക്കുക തുടങ്ങി പ്രവർത്തനങ്ങൾ പൂർത്തിയാക്കാൻ ബന്ധപ്പെട്ട ഉദ്യോഗസ്ഥർക്ക് മേയർ നിർദ്ദേശം നൽകി. നഗരത്തിലെത്തുന്ന ഭക്തജനങ്ങൾക്കു വേണ്ട വെള്ളം ഉൾപ്പെടെയുള്ള സൗകര്യം എത്തിക്കുന്നതിനും പൊങ്കാലയ്‌ക്ക് ശേഷം നഗരത്തിന്റെ ശുചീകരണത്തിന് വേണ്ട നടപടികൾ കൈക്കൊളളുന്നതിനും ബന്ധപ്പെട്ട ഉദ്യോഗസ്ഥരെ ചുമതലപ്പെടുത്തി. കഴിഞ്ഞവർഷത്തെപ്പോലെ ഇത്തവണയും ശുചീകരണം സീറോ ബഡ്‌ജറ്റ് സംവിധാനത്തിലാണ് നടപ്പിലാക്കുന്നത്. ജനപ്രതിനിധികൾ,ക്ഷേത്രഭാരവാഹികൾ,വിവിധ വകുപ്പ് ഉദ്യോഗസ്ഥർ എന്നിവർ യോഗത്തിൽ പങ്കെടുത്തു.