ജൈവകവചം തീർക്കാൻ കുളവെട്ടി മരങ്ങൾ

തൃശൂർ: ജൈവവൈവിദ്ധ്യ ബോർഡിന്റെ സഹായത്തോടെ പാഞ്ഞാൾ പഞ്ചായത്തും തൃശൂർ സെന്റ് തോമസ് കോളേജ് ബോട്ടണി വിഭാഗവും സംയുക്തമായി നടത്തുന്ന കുളവെട്ടി മരങ്ങളുടെ സംരക്ഷണ പദ്ധതിയുടെ ഉദ്ഘാടനം പാഞ്ഞാൾ പഞ്ചായത്ത് പ്രസിഡന്റ് വി. തങ്കമ്മ നിർവഹിച്ചു.

ജൈവവൈവിദ്ധ്യ ബോർഡ് അനുവദിച്ച 1.6 ലക്ഷം ഉപയോഗിച്ചാണ് പദ്ധതി. മുപ്പതോളം കുളവെട്ടി തൈകൾ ഭാരതപ്പുഴയുടെ തീരത്തുള്ള പഞ്ചായത്ത് പൊതു ശ്മശാനത്തോട് ചേർന്ന് നട്ടു. വംശനാശ ഭീഷണി നേരിടുന്ന ഇത്തരം മരങ്ങൾക്ക് ആവാസ വ്യവസ്ഥ ഒരുക്കുകയാണ് പഞ്ചായത്ത് ചെയ്യുന്നതെന്ന് പ്രോജക്ട് ഇൻവെസ്റ്റിഗേറ്റർ ഡോ. പി.വി. ആന്റോ അറിയിച്ചു. സെന്റ് തോമസ് കോളേജ് എം.എസ്.സി ബോട്ടണി വിദ്യാർത്ഥി എ.ആർ. അഞ്ജന പദ്ധതി വിശദീകരിച്ചു.

പഞ്ചായത്ത് വൈസ് പ്രസിഡന്റ് പി. കൃഷ്ണൻകുട്ടി അദ്ധ്യക്ഷനായ ചടങ്ങിൽ ക്ഷേമകാര്യ സ്ഥിരം സമിതി അദ്ധ്യക്ഷൻ എ.കെ. ഉണ്ണിക്കൃഷ്ണൻ, വിദ്യാഭ്യാസ ആരോഗ്യ സ്ഥിരം സമിതി അദ്ധ്യക്ഷ ടി.വി. രമണി, വികസനകാര്യ സ്ഥിരം സമിതി അദ്ധ്യക്ഷ നിർമ്മല രവികുമാർ തുടങ്ങിയവർ പ്രസംഗിച്ചു.