തൃശൂർ: തേക്കിൻ കാട് മൈതാനത്തുള്ള നെഹ്റു മണ്ഡപം, വിദ്യാർത്ഥി കോർണർ, ലേബർ കോർണർ എന്നിവ നവീകരിച്ച് സംരക്ഷിക്കാനും സൗന്ദര്യവത്കരിക്കാനുമായി ടി.എൻ.പ്രതാപൻ എം.പിയുടെ ആസ്തി വികസന ഫണ്ടിൽ നിന്നും രണ്ട് കോടി അനുവദിച്ചു. കൊച്ചിൻ ദേവസ്വം ബോർഡ് ഇത്തരമൊരു അപേക്ഷ നൽകിയിരുന്നു. ശ്രീ വടക്കുന്നാഥ ക്ഷേത്രത്തിലെ ചടങ്ങുകൾക്കും ആചാരങ്ങൾക്കും ഭംഗം വരാത്ത വിധം തൃശൂർ പൂരത്തിന്റെ ചടങ്ങുകൾക്ക് യാതൊരുവിധ ബുദ്ധിമുട്ടും സൃഷ്ടിക്കാത്ത വിധവുമാണ് തേക്കിൻകാട് സൗന്ദര്യവത്കരണത്തിന് കൊച്ചിൻ ദേവസ്വം ബോർഡ് മാസ്റ്റർ പ്ലാൻ തയ്യാറാക്കിയിരിക്കുന്നതെന്ന് ദേവസ്വം ബോർഡ് പ്രസിഡന്റ് അറിയിച്ചു.
ശുദ്ധമായ പാൽ ഉത്പാദനം: പരിശീലനം 17ന്
തൃശൂർ: തൃശൂർ, പാലക്കാട് ജില്ലകളിലെ ക്ഷീര കർഷകർക്കായി 'ശുദ്ധമായ പാൽ ഉത്പാദനത്തിൽ പരിശീലനം സംഘടിപ്പിക്കുന്നു. 17, 18 തീയതികളിൽ ആലത്തൂർ വാനൂരിലെ ക്ഷീര പരിശീലന കേന്ദ്രത്തിലാണ് പരിശീലനം. 20 രൂപയാണ് പ്രവേശന ഫീസ്. ആധാർ കാർഡ്, തിരിച്ചറിയൽ കാർഡ്, ബാങ്ക് പാസ് ബുക്ക് എന്നിവയുടെ പകർപ്പ് സഹിതം കർഷകർക്ക് പങ്കെടുക്കാം. താത്പര്യമുള്ളവർ 16ന് വൈകിട്ട് 5 ന് മുമ്പായി dd-dtc-pkd.dairy@kerala.gov.in/ dtcalathur@gmail.com എന്ന ഇ മെയിലിലോ 04922226040, 9446972314 ഫോൺ നമ്പറിലോ രജിസ്റ്റർ ചെയ്യണം.
വിദ്യാകിരണം സ്കോളർഷിപ്പിന് അപേക്ഷിക്കാം
തൃശൂർ: സാമ്പത്തിക പരാധീനതയുള്ള ഭിന്നശേഷിക്കാരായ മാതാപിതാക്കളുടെ മക്കൾക്ക് വിദ്യാഭ്യാസ ധനസഹായം നൽകുന്ന 'വിദ്യാകിരണം' പദ്ധതിക്ക് ജൂലായ് 30 വരെ അപേക്ഷിക്കാമെന്ന് മന്ത്രി ഡോ.ആർ.ബിന്ദു അറിയിച്ചു. മാതാപിതാക്കൾ രണ്ട് പേരുമോ ആരെങ്കിലും ഒരാളോ ഭിന്നശേഷിയുള്ളവരാണെങ്കിൽ സ്കോളർഷിപ്പ് ലഭിക്കും. ഒന്ന് മുതൽ അഞ്ച് വരെ ക്ലാസുകാർക്ക് 300 രൂപയും ആറ് മുതൽ പത്തുവരെ 500 രൂപയും പ്ലസ് വൺ, പ്ലസ് ടു, ഐ.ടി.ഐ, മറ്റ് തത്തുല്യ കോഴ്സുകൾ എന്നിവയ്ക്ക് 750 രൂപ, ഡിഗ്രി, പിജി, പൊളിടെക്നിക്ക് തത്തുല്യമായ ട്രെയിനിംഗ് കോഴ്സുകൾ, പ്രൊഫഷണൽ കോഴ്സുകൾ എന്നിവയ്ക്ക് 1000 രൂപയുമാണ് പ്രതിമാസ സ്കോളർഷിപ്പ്.
ബി.പി.എൽ വിഭാഗത്തിൽപ്പെട്ടവർ ആയിരിക്കണം. മാതാവിന്റെയോ പിതാവിന്റെയോ വൈകല്യത്തിന്റെ തോത് 40 ശതമാനമോ അതിനുമുകളിലോ ആയിരിക്കണം. മറ്റ് വിദ്യാഭ്യാസ ധനസഹായം ലഭിക്കുന്നവർ ആകരുത് തുടങ്ങിയ വ്യവസ്ഥകളുണ്ട്. എല്ലാ ക്ലാസുകളിലേക്കും പരമാവധി പത്തു മാസത്തേക്കാണ് സ്കോളർഷിപ്പ്. suneethi.sjd.kerala.gov.in, 0471 2302851, 0471 2306040.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |