സതേൺ ഹെൽത്ത് ഫുഡ്‌സ് ഏറ്റെടുത്ത് റിലയൻസ് കൺസ്യൂമർ

കൊച്ചി: റിലയൻസ് ഇൻഡസ്ട്രീസിന്റെ എഫ്.എം.സി.ജി വിഭാഗമായ റിലയൻസ് കൺസ്യൂമർ പ്രോഡക്ട്‌സ് തമിഴ്‌നാട്ടിലെ പ്രമുഖ ഹെൽത്ത് ഫുഡ് നിർമ്മാതാക്കളായ സതേൺ ഹെൽത്ത് ഫുഡ്‌സിനെ ഏറ്റെടുത്തു. 'മന്ന' എന്ന ഫ്‌ളാഗ്ഷിപ്പ് ബ്രാൻഡിൽ അറിയപ്പെടുന്ന ഈ കമ്പനി ഇരുപത് വർഷത്തിലേറെയായി വൈവിദ്ധ്യമാർന്ന ഭക്ഷ്യ ഉത്പ്പന്നങ്ങൾ നിർമ്മിക്കുന്ന സ്ഥാപനമാണ്.
മന്നയുടെ ഏറ്റെടുക്കൽ റിലയൻസിന്റെ ഫുഡ്‌സ് ആൻഡ് സ്റ്റേപ്പിൾസ് പോർട്ട്‌ഫോളിയോയ്ക്ക് കൂടുതൽ കരുത്താകും. ഉദയം, ഇൻഡിപെൻഡൻസ്, സിൽ എന്നീ ബ്രാൻഡുകൾ റിലയൻസ് കൺസ്യൂമർ പ്രോഡക്ട്‌സിന്റെ ശ്രേണിയിൽ ഉണ്ട് .
ബ്രാൻഡിന്റെ പാക്കേജ്ഡ് ഫുഡ്‌സ് പോർട്ട്‌ഫോളിയോയ്ക്ക് കൂടുതൽ ശക്തി നൽകുന്നതോടൊപ്പം ഉപഭോക്താക്കൾക്ക് മികച്ച പോഷകഭക്ഷണം നൽകുന്നതിനും മന്നയുടെ ഏറ്റെടുക്കൽ സഹായിക്കുമെന്ന് റിലയൻസ് കൺസ്യൂമർ പ്രോഡക്ട്‌സ് ഡയറക്ടർ ടി. കൃഷ്ണകുമാർ പറഞ്ഞു.