അപകടാവസ്ഥയിലായ കെട്ടിടം യാത്രക്കാർക്ക് ഭീഷണി

ചാത്തന്നൂർ: ചാത്തന്നൂർ പൊലീസ് സ്റ്റേഷന് കിഴക്ക് ഭാഗത്ത് വലിയപള്ളി റോഡിനോട് ചേർന്ന് അപകടാവസ്ഥയിലായ കെട്ടിടം യാത്രക്കാർക്ക് ഭീഷണിയാകുന്നു. ചുറ്റുമതിൽ തന്നെ ഭിത്തിയാക്കി നിർമ്മിച്ചിരിക്കുന്ന കെട്ടിടത്തിന്റെ അടിത്തറ ഏതാണ്ട് പൂർണമായി തകർന്ന അവസ്ഥയിലാണ്. കുറച്ചുഭാഗം നാളുകൾക്കുമുമ്പ് തകർന്നു വീഴുകയും ചെയ്തു.

എന്നാൽ,​ ഏതു നിമിഷവും നിലംപൊത്താവുന്ന കെട്ടിടത്തിന്റെ ഉടമസ്ഥനോ അധികൃതരോ

അപകടം ഒഴിവാക്കാനോ സംരക്ഷിക്കാനോ ഇതുവരെ മുന്നോട്ടുവന്നിട്ടില്ല.

ദേശീയപാതയിൽ നിന്ന് ചാത്തന്നൂർ കുമ്മല്ലൂർ റോഡിലേയ്ക്കും തിരികെയും നിരവധി വാഹനങ്ങൾ ദിവസേന കടന്നുപോകുന്ന വഴിയാണിത്. വലിയപള്ളിയിലേയ്ക്ക് പോകുന്നവരും ഈ വഴിയെയാണ് പ്രധാനമായും ആശ്രയിക്കുന്നത്. കെട്ടിടത്തിന്റെ അപകടാവസ്ഥയ്ക്ക് പരിഹാരം കാണണമെന്ന് ആവശ്യപ്പെട്ട് ചാത്തന്നൂർ സിറ്റിസൺ ഫോറം പ്രസിഡന്റ് ജി.ദിവാകരന്റെ നേതൃത്വത്തിൽ റവന്യൂ, ഗ്രാമപ്പഞ്ചായത്ത്, പൊലീസ് അധികൃതർക്ക് പരാതി നൽകി.