പൊടിപൊടിച്ച് വണ്ടിക്കച്ചവടം, 2022 ഫെബ്രുവരിയേക്കാൾ 17 ശതമാനം വില്പനവളർച്ച

കൊച്ചി: ഉപഭോക്താക്കളിൽ നിന്ന് മികച്ച ഡിമാൻഡ് ലഭിക്കുകയും ആനുപാതികമായി വിതരണം മെച്ചപ്പെടുകയും ചെയ്‌തതോടെ ഫെബ്രുവരിയിൽ ആഭ്യന്തര മൊത്തവാഹന വിപണി കാഴ്ചവച്ചത് മികച്ച മുന്നേറ്റം. കാറും വാനും എസ്.യു.വികളും ഉൾപ്പെടുന്ന പാസഞ്ചർ വാഹനവിപണി 2022 ഫെബ്രുവരിയേക്കാൾ 17 ശതമാനം വില്പനവളർച്ചയാണ കുറിച്ചത്. 2,​98,​093 പാസ‍‍‍ഞ്ചർ വാഹനങ്ങളാണ് പുതുതായി ഫാക്‌ടറികളിൽ നിന്ന് ഡീലർഷിപ്പുകളിലേക്ക് എത്തിയതെന്ന് നിർമ്മാതാക്കളുടെ കൂട്ടായ്‌മയായ സൊസൈറ്റി ഒഫ് ഇന്ത്യൻ ഓട്ടോമൊബൈൽ മാനുഫാക്ചറേഴ്‌സ് (സിയാം)​ വ്യക്തമാക്കി. ഇതിൽ ടാറ്റാ മോട്ടോഴ്‌സിന്റെ വില്പനക്കണക്ക് ഉൾപ്പെടുന്നില്ല. ടൂവീലർ വില്പന ഫെബ്രുവരിയിൽ 3.8 ശതമാനം ഉയർന്നു. പുതുതായി 11.84 ലക്ഷം ടൂവീലറുകളാണ് ഡീലർഷിപ്പുകളിലെത്തിയത്. സ്കൂട്ടർ വില്പന 4 ശതമാനം മെച്ചപ്പെട്ട് 3.76 ലക്ഷത്തിലെത്തി; മോട്ടോർസൈക്കിൾ വില്പന 3.7 ശതമാനം വർദ്ധിച്ച് 7.71 ലക്ഷം യൂണിറ്റുകളായി. മുച്ചക്രവാഹന വിപണി കഴിഞ്ഞമാസം ഇരട്ടിയോളം ഉയർന്ന് 48,​903 യൂണിറ്റുകളിലെത്തി.