ട്രാഫിക് ലൈറ്റുകൾ കത്തുന്നില്ല 

ഏഴംകുളം: ഏഴംകുളം ജംഗ്ഷനിലെ ട്രാഫിക് വിളക്കുകൾ തകരാറിലായിട്ട് വർഷം ഒന്നായിട്ടും പരിഹരിക്കാൻ നടപടികളില്ല. നിരവധി വാഹനങ്ങൾ എത്തുന്ന ഇവിടെ ട്രാഫിക് വിളക്കിന്റെ ആവശ്യം ദിനംപ്രതി വർദ്ധിച്ചു വരികയാണ്. കെ.പി റോഡ്, ഏനാത്ത്,​​ കൈപ്പട്ടൂർ റോഡുകൾ ചേരുന്നത് ഇവിടെയാണ്. വാഹനങ്ങൾ തോന്നുംപടി വരുന്ന അവസ്ഥയാണിപ്പോൾ. ട്രാഫിക് വിളക്ക് ഇല്ലാത്തതിനാൽ വാഹനങ്ങൾ അമിത വേഗത്തിൽ വരുന്നത് അപകട സാദ്ധ്യത കൂട്ടുന്നു. നാട്ടുകാരും പൊതുപ്രവർത്തകരും പരാതി നൽകിയിട്ടും അധികൃതർ നടപടി എടുക്കുന്നില്ലെന്നും ആക്ഷേപമുണ്ട്.