കോസ്റ്റൽ അതോറിറ്റി പുന:സംഘടന ഒരാഴ്ചയ്ക്കകം: കേന്ദ്രമന്ത്രി

കൊച്ചി: കോസ്റ്റൽ സോൺ മാനേജ്‌മെന്റ് അതോറിട്ടി​ ഒരാഴ്ചയ്ക്കകം പുന:സംഘടിപ്പിക്കുമെന്ന് കേന്ദ്ര പരിസ്ഥിതി വനം വകുപ്പ് മന്ത്രി ഭുപീന്ദർ യാദവ് ഹൈബി ഈഡൻ എം പിയെ അറിയിച്ചു. കഴിഞ്ഞ ഒക്ടോബർ 28ന് കാലാവധി കഴിഞ്ഞ അതോറിട്ടി​ പുന: സംഘടന, സംസ്ഥാന സർക്കാർ പ്രതിനിധികളെ നാമനിർദ്ദേശം ചെയ്യുന്നതിലെ കാലതാമസം മൂലമാണ് നീണ്ടുപോയത്. തീരദേശത്തെ നിർമ്മാണ പ്രവർത്തനങ്ങൾക്ക് അനുമതി നൽകേണ്ടത് അതോറിട്ടി​യാണ്. ലൈഫ് ഭവന പദ്ധതി, പ്രാധാനമന്ത്രി ആവാസ് യോജന തുടങ്ങിയ പദ്ധതികളിൽ ഉൾപ്പെട്ടവർക്ക് പോലും നിർമ്മാണം നടത്താൻ കഴിയാത്ത സാഹചര്യമാണെന്നും അതോറിട്ടി​ ഉടൻ പുന:സംഘടിപ്പിക്കണമെന്നും എം.പി ആവശ്യപ്പെട്ടു.