അടുത്ത മാസം മുതൽ പണി തുടങ്ങാനിരിക്കെ എ ഐ ക്യാമറയ്ക്ക് 'പണി' കിട്ടി

അടൂർ: ഹൈസ്കൂൾ ജംഗ്ഷനിൽ എം സി റോഡും കെ പി റോഡും പരസ്പരം വേർപിരിയുന്ന ഭാഗത്ത് സ്ഥാപിച്ചിരുന്ന എ ഐ ക്യാമറ ടിപ്പർ ലോറി ഇടിച്ചു തകർത്തു. വ്യാഴാഴ്ച രാത്രി 12ന് കായംകുളത്ത് നിന്ന് അടൂരിലേക്ക് വന്ന ടിപ്പർലോറിയാണ് ക്യാമറ സ്ഥാപിച്ചിരുന്ന തൂൺ ഇടിച്ച് തകർത്തത്. ടിപ്പർ ലോറി പൊലീസ് കസ്റ്റഡിയിലെടുത്തു.

അടുത്ത മാസം അഞ്ച് മുതല്‍ ഗതാഗത നിയമ ലംഘനത്തിന് പിഴ ചുമത്താനിരിക്കെയാണ് പോസ്റ്റ് ഒടിഞ്ഞ് വീണത്. അതേസമയം എ ഐ ട്രാഫിക് ക്യാമറകളുടെ പ്രവർത്തനം വിലയിരുത്താൻ അഡീഷണൽ ട്രാൻസ്പോർട്ട് കമ്മീഷണറുടെ നേതൃത്വത്തിലുള്ള വിദഗ്ദ്ധ സമിതിയെ നിയോഗിച്ചിട്ടുണ്ട്. അടുത്ത മാസം അഞ്ചിന് മുമ്പ് സമിതി ക്യാമറയുടെ സാങ്കേതിക വശങ്ങൾ പരിശോധിച്ച് റിപ്പോർട്ട് നൽകണമെന്നാണ് വിദഗ്ദ്ധ സമിതിക്ക് നല്‍കിയിരിക്കുന്ന നിര്‍ദ്ദേശം. കഴിഞ്ഞ ദിവസം ചേർന്ന സാങ്കേതിക സമിതിയുടെതാണ് തീരുമാനം. ക്യാമറ വഴി ട്രാഫിക് നിയമലംഘനങ്ങളിൽ പിഴ ചുമത്തുന്നതിന് മുമ്പ് ഒരു സമിതി ക്യാമറ പ്രവർത്തനം വിലയിരുത്തണമെന്ന വ്യവസ്ഥ പ്രകാരമാണ് പുതിയ സമിതിയെ നിയോഗിച്ചിരിക്കുന്നത്.