സൈബർ തട്ടിപ്പ്: 11 സംസ്ഥാനങ്ങളിൽ സി.ബി.ഐ റെയ്ഡ്

കൊച്ചി: സൈബർ തട്ടിപ്പുകൾക്കെതിരെ കേരളം ഉൾപ്പെടെ 11 സംസ്ഥാനങ്ങളിലെ 76 സ്ഥലങ്ങളിൽ സി.ബി.ഐ നടത്തിയ റെയ്ഡിൽ ലാപ്പ്ടോപ്പുകൾ, ഹാർഡ് ഡിസ്‌ക് തുടങ്ങി ഡിജിറ്റൽ ഉപകരണങ്ങളുടെ വൻശേഖരം പിടിച്ചെടുത്തു. 100 കോടി രൂപയുടെ ക്രിപ്റ്റോ കറൻസി തട്ടിപ്പും തകർത്തു.

സ്വകാര്യ, ദേശീയ, അന്തർദേശീയ ഏജൻസികളുമായി സഹകരിച്ചാണ് ഓപ്പറേഷൻ ചക്ര രണ്ട് എന്നപേരിൽ റെയ്ഡുകൾ നടത്തിയത്. കേരളത്തിന് പുറമെ മദ്ധ്യപ്രദേശ്, ഉത്തർപ്രദേശ്, കർണാടക, ഹരിയാന, തമിഴ്‌നാട്, പഞ്ചാബ്, ബിഹാർ, ഡൽഹി, പശ്ചിമ ബംഗാൾ, ഹിമാചൽ പ്രദേശ് സംസ്ഥാനങ്ങളിലായിരുന്നു റെയ്ഡ്.

32 മൊബൈൽ ഫോണുകൾ, 48 ലാപ്പ്ടോപ്പുകൾ, ഹാർഡ് ഡിസ്‌കുകൾ, 33 സിം കാർഡുകൾ, പെൻഡ്രൈവുകൾ എന്നിവ പിടിച്ചെടുത്തു. നിരവധി ബാങ്ക് അക്കൗണ്ടുകൾ മരവിപ്പിച്ചു. സൈബർ തട്ടിപ്പുകൾക്ക് ഉപയോഗിച്ച 15 ഇ മെയിൽ അക്കൗണ്ടുകളും കണ്ടെത്തി.

ആഗോള ഐ.ടി കമ്പനി, ബഹുരാഷ്ട്ര ഓൺലൈൻ വ്യാപാര സ്ഥാപനം എന്നീ വ്യാജേന അഞ്ച് സംസ്ഥാനങ്ങളിൽ ഒമ്പത് കോൾ സെന്ററുകൾ നടത്തിയതും കണ്ടെത്തി. വ്യാജ ക്രിപ്റ്റോ മൈനിംഗ് ഓപ്പറേഷന്റെ മറവിൽ നടത്താൻ ശ്രമിച്ച100 കോടി രൂപയുടെ തട്ടിപ്പും തകർത്തു.

ഓപ്പറേഷൻ ചക്രയിലൂടെ ശേഖരിച്ച വിവരങ്ങൾ അന്താരാഷ്ട്ര ഏജൻസികൾക്ക് കൈമാറുമെന്ന് സി.ബി.ഐ അറിയിച്ചു.