ഐ.എസ്.ആർ.ഒയെ അഭിനന്ദിച്ച് പ്രധാനമന്ത്രി
തിരുവനന്തപുരം: ചന്ദ്രയാൻ 3 പേടകത്തെ തിരിച്ചുകൊണ്ടുവന്ന ഐ.എസ്.ആർ.ഒയെ പ്രധാനമന്ത്രി നരേന്ദ്രമോദി അഭിനന്ദിച്ചു.
ചന്ദ്രയാൻ 3ന്റെ പ്രൊപ്പൽഷൻ മൊഡ്യൂളിനെ ചന്ദ്രന്റെ ഭ്രമണപഥത്തിൽ നിന്ന് ഭൂമിയുടെ ഭ്രമണപഥത്തിലേക്ക് കൊണ്ടുവരുന്ന നിർണായക പരീക്ഷണമാണ് വിജയിച്ചിരിക്കുന്നത്. ഇന്ത്യക്കാരനെ ചന്ദ്രനിലേക്ക് അയയ്ക്കുക എന്നതുൾപ്പെടെയുള്ള ഭാവി ബഹിരാകാശ ശ്രമങ്ങളിൽ സാങ്കേതികവിദ്യയുടെ മറ്റൊരു നാഴികക്കല്ല് കൂടി കൈവരിച്ചതായി പ്രധാനമന്ത്രി പറഞ്ഞു.
ശബരിമല തീർത്ഥാടനം: സ്പെഷ്യൽ ട്രെയിൻ അനുവദിക്കണം
ന്യൂഡൽഹി: ശബരിമല തീർത്ഥാടന തിരക്ക് പരിഗണിച്ചും ക്രിസ്മസ്-ന്യൂ ഇയർ അവധി കണക്കിലെടുത്തും രാജ്യത്തെ മെട്രോ നഗരങ്ങളിൽ നിന്നും കേരളത്തിലേക്ക് കൂടുതൽ സ്പെഷ്യൽ ട്രെയിനുകൾ അനുവദിക്കണമെന്ന് കെ. മുരളീധരൻ എം.പി ലോക്സഭയിൽ ആവശ്യപ്പെട്ടു. കൊവിഡ് സമയത്ത് നിറുത്തലാക്കിയ പാസഞ്ചർ ട്രെയിൻ സ്റ്റോപ്പുകൾ പുനഃസ്ഥാപിക്കണമെന്നും വിവിധ ട്രെയിനുകൾ ദീർഘനേരം പിടിച്ചിടുന്നതുമൂലം യാത്രക്കാർക്കുണ്ടാകുന്ന ബുദ്ധിമുട്ടുകൾ പരിഹരിക്കണമെന്നും എം.പി ആവശ്യപ്പെട്ടു.
എസ്.എഫ്.ഐ രാപകൽ സമരം
തിരുവനന്തപുരം: സർവകലാശാലകളെ കാവിവത്കരിക്കാനുള്ള നീക്കത്തിനെതിരെയും സർവകലാശാലകളിൽ ജനാധിപത്യം അട്ടിമറിക്കുന്ന ഗവർണറുടെ രാജി ആവശ്യപ്പെട്ടും എസ്.എഫ്.ഐ കേരള സർവകലാശാലയ്ക്ക് മുന്നിൽ രാപകൽ സമരം ആരംഭിച്ചു. സംസ്ഥാന പ്രസിഡന്റ് കെ.അനുശ്രീ ഉദ്ഘാടനം ചെയ്തു.
സർവകലാശാലകളെ കാവിവത്കരിക്കാനുള്ള കേന്ദ്രസർക്കാരിന്റെ ബോധപൂർവമായ ശ്രമങ്ങൾക്ക് ഗവർണർ ഒത്താശ ചെയ്യുകയാണെന്നും സർവകലാശാലകളിലെ ജനാധിപത്യമൂല്യങ്ങളെ തകർക്കാൻ ഗവർണർ കൂട്ടുനിൽക്കുകയാണെന്നും അനുശ്രീ ആരോപിച്ചു.
ജില്ലാ പ്രസിഡന്റ് നന്ദൻ അദ്ധ്യക്ഷത വഹിച്ചു. ജില്ലാ സെക്രട്ടറി എസ്.കെ.ആദർശ്, സഞ്ജയ് തുടങ്ങിയവർ പങ്കെടുത്തു. ഇന്ന് രാവിലെ 9ന് സമരം അവസാനിക്കും.