ലളിതഗാനത്തിൽ പാലക്കാടിന്റെ ശ്രീ

പാലക്കാട്: എച്ച്.എസ് വിഭാഗം ലളിതഗാനത്തിൽ ഫസ്റ്റ് എ ഗ്രേഡ് നേടിയത് എൻ.എം.ശ്രീഹരി എന്ന ശ്രീഹരി പാലക്കാട്. ഫ്ളവേഴ്സ് ടി.വിയിലെ ടോപ് സിംഗർ സീസൺ-2 മെഗാ ഫൈനലിസ്റ്റാണ് കേരളശേരി ഹൈസ്കൂളിലെ വിദ്യാർത്ഥിയായ ശ്രീഹരി. വാദ്യകലാകാരൻ തിരുവില്വാമല മണികണ്ഠന്റെയും ശോഭനകുമാരിയുടെയും മകനാണ്.

പിന്നണി ഗായകനായും ശ്രീഹരി ശോഭിക്കുന്നു. സ്റ്റേഷൻ 5, ആനപ്പറമ്പിലെ വേൾഡ്കപ്പ്, പച്ചപ്പ് തേടി എന്നീ സിനിമകളിലും നിരവധി ആൽബങ്ങളിലും ഇതിനകം പാടി. കഴിഞ്ഞ വർഷം സംസ്ഥാന കലോത്സവത്തിലെ സംസ്കൃത ഗാനാലാപനത്തിൽ ഒന്നാംസ്ഥാനം നേടിയിരുന്നു. ജില്ലാ കലോത്സവത്തിൽ ഇന്ന് ഈ ഇനത്തിൽ ശ്രീഹരി മത്സരിക്കും. മാത്രമല്ല, കലാ ഉത്സവിൽ നാടൻപാട്ട് ഇനത്തിൽ സംസ്ഥാന തലത്തിൽ ഫസ്റ്റ് എ ഗ്രേഡ് നേടിയിരുന്നു. ഇതേയിനത്തിൽ ജനുവരി ഒമ്പതിന് ഡൽഹിയിൽ പരിപാടി അവതരിപ്പിക്കും. വിദ്യാരംഗം കലാസാഹിത്യ വേദി നാടൻപാട്ട് ഇനത്തിൽ ഫസ്റ്റ് എ ഗ്രേഡ് നേടി സംസ്ഥാന തലത്തിലേക്കും തിരഞ്ഞെടുക്കപ്പെട്ടു.