വമ്പൻ വിജയത്തോടെ ഗോകുലത്തിന്റെ സൈൻഓഫ്

കോഴിക്കോട്: ഐ ലീഗ് സീസണിലെ തങ്ങളുടെ അവസാന മത്സരത്തിൽ ഗോകുലത്തിന് വൻ വിജയം. മണിപ്പൂർ ക്ലബ് ട്രാവു എഫ്.സിക്കെതിരെ 6-1ന് ഗോകുലം ഹോം ഗ്രൗണ്ടിൽ വിജയം കുറിച്ചത്.
19ാം മിനിട്ടിൽ അലക്‌സ് , 29, 34 മിനിട്ടുകളിൽ നൗഫൽ, 39ാം മിനിട്ടിൽ കൊംറോൺ എന്നിവർ ആദ്യപകുതിയിൽ വലകുലുക്കി.
രണ്ടാം പകുതിയിൽ 90 +2 മിനിട്ടിൽ മറ്റിജ ബാബോവിച് 90 +4 മിനിട്ടിൽ നിക്കോള എന്നിവരാണ് ഗോളുകൾ നേടിയത്. 61 ാം മിനിട്ടിൽ ഇസ്സാക് നൂഹു പെനാൽറ്റിയിലൂടെ ട്രാവുവിന്റെ ആശ്വാസ ഗോൾ നേടി.

വിജയത്തോടെ ഗോകുലം പോയിന്റ് പട്ടികയിൽ മൂന്നാം സ്ഥാനത്തെത്തി.

കളിയിലെ കാര്യങ്ങൾ

ഇന്നലെ നേടിയ ഗോളോടുകൂടെ 19 ഗോളുകളുമായി ഗോകുലം ക്യാപ്റ്റൻ അലക്‌സാൺഡ്രോ സാഞ്ചസ് ലോപ്പസ് ഗോൾ വേട്ടക്കാരുടെ പട്ടികയിൽ ഒന്നാം സ്ഥാനത്താണ്. അഞ്ച് ഗോളുകളുമായി മലയാളി താരം നൗഫൽ ആണ് ലീഗിൽ ഗോകുലത്തിനായി ഏറ്റവും കൂടുതൽ ഗോളുകൾ നേടിയ ഇന്ത്യൻ കളിക്കാരൻ.
ടൂർണമെന്റിൽ 24 മത്സരങ്ങളിൽ നിന്ന് 12 വിജയവും ആറ് സമനിലയും ആറ് തോൽവിയുമാണ് ഗോകുലത്തിന് നേടാനായത്.