ലോകകപ്പിന് മുമ്പ് പാകിസ്ഥാന് അയർലൻഡ് ഷോക്ക്
ഡബ്ലിൻ: ട്വന്റി-20 ലോകകപ്പിന് തൊട്ടുമുൻപ് പാകിസ്ഥാനെ ഞെട്ടിച്ച് അയർലൻഡ് വിജയഗാഥ. ഇരുടീമുകളും തമ്മിലുള്ള ട്വന്റി-20 പരമ്പരയിലെ ആദ്യ മത്സരത്തിൽ അഞ്ച് വിക്കറ്റിന്റെ വിജയം നേടി അയർലൻഡ് പാകിസ്ഥാനെ അട്ടിമറിച്ചു. ഡബ്ലിൻ വേദിയായ മത്സരത്തിൽ ആദ്യം ബാറ്റ് ചെയ്ത പാകിസ്ഥാൻ 20 ഓവറിൽ 6 വിക്കറ്റ് നഷ്ടത്തിൽ 182 റൺസെടുത്തു.മറുപടിക്കിറങ്ങിയ അയർലൻഡ് ഒരു പന്ത് ശേഷിക്കെ വിജയലക്ഷ്യത്തിലെത്തി (183/5).
55 പന്തിൽ നിന്ന് രണ്ട് സിക്സും 10 ഫോറുമടക്കം 77 റൺസെടുത്ത ഓപ്പണർ ആൻഡ്രു ബാൽബിർണിയാണ് അവരുടെ വിജയത്തിന് ചുക്കാൻ പിടിച്ചത്. ഹാരി ടെക്ടർ(36), ജോർജ് ഡോക്റെൽ (24) എന്നിവരും ഭേദപ്പെട്ട പ്രകടനം പുറത്തെടുത്തു. ഇതോടെ മൂന്ന് മത്സരങ്ങൾ ഉൾപ്പെട്ട പരമ്പരയിൽ അയർലൻഡ് 1-0ത്തിന് മുന്നിലെത്തി.