ശബരിമലനട നാളെ തുറക്കും, പ്രതിഷ്ഠാദിനം 19ന് 

ശബരിമല: ഇടവമാസ പൂജകൾക്കും പ്രതിഷ്ഠാദിന ചടങ്ങുകൾക്കുമായി നാളെ വൈകിട്ട് അഞ്ചിന് തന്ത്രി കണ്ഠരര് മഹേഷ് മോഹനരുടെ സാന്നിദ്ധ്യത്തിൽ മേൽശാന്തി വി.എൻ.മഹേഷ് നമ്പൂതിരി ശബരിമല നട തുറക്കും. തുടർന്ന് മേൽശാന്തി പതിനെട്ടാംപടിക്ക് താഴെ തിരുമുറ്റത്തെ ആഴിയിൽ അഗ്‌നി തെളിക്കും. മാളികപ്പുറം ക്ഷേത്രനട അവിടുത്തെ മേൽശാന്തി പി.ജി. മുരളിയും തുറക്കും.
15 മുതൽ നിർമ്മാല്യ ദർശനം,പതിവ് അഭിഷേകം,കിഴക്കേ മണ്ഡപത്തിൽ ഗണപതിഹോമം എന്നിവ നടക്കും. രാവിലെ 5.30 മുതൽ ഏഴ് വരെയും ഒമ്പത് മുതൽ 11 വരെയും നെയ്യഭിഷേകം. 7.30ന് ഉഷഃപൂജ,തുടർന്ന് ഉദയാസ്തമയപൂജ,25 കലശം,കളഭാഭിഷേകം,ഉച്ചപൂജ,വൈകിട്ട് 6.30ന് ദീപാരാധന,6.45ന് പടിപൂജ,പുഷ്പാഭിഷേകം,അത്താഴ പൂജ എന്നിവ നടക്കും. പ്രതിഷ്ഠാദിന ചടങ്ങുകൾ 19ന് നടക്കും. തുടർന്ന് പൂജകൾ പൂർത്തിയാക്കി അന്നേദിവസം രാത്രി 10ന് നടയടയ്ക്കും.