പരിശീലനത്തിന് തുടക്കം

വണ്ടൂർ: സബ് ജില്ലയിലെ ഹയർ സെക്കൻഡറി അദ്ധ്യാപകർക്കായി നാല് ദിവസം നീണ്ടുനിൽക്കുന്ന അദ്ധ്യാപക പരിശീലനം വാണിയമ്പലം ജി.എച്ച്.എസ്.എസിൽ ആരംഭിച്ചു. മൂന്ന് ഘട്ടങ്ങളായാണ് പരിശീലനം സംഘടിപ്പിക്കുന്നത്. ജൂൺ അഞ്ചു മുതൽ 10 വരെ ഒന്നാംഘട്ടവും ജൂൺ 12 മുതൽ 15 വരെ രണ്ടാംഘട്ടവും ജൂൺ 19 മുതൽ 22 വരെ മൂന്നാംഘട്ടവും നടക്കും. വിദ്യാഭ്യാസ ജില്ലാ അടിസ്ഥാനത്തിലാണ് പരിശീലനം. വണ്ടൂർ വിദ്യാഭ്യാസ ജില്ലയിൽ ജി.എച്ച്.എസ്.എസ് അരീക്കോട്, എം.ഇ.എസ് എച്ച്.എസ്.എസ് മമ്പാട്, ജി.എച്ച്.എസ്.എസ് വാണിയമ്പലം എന്നിവിടങ്ങളിലായാണ് പരിശീലനം. പരിശീലനത്തിന്റെ ഉദ്ഘാടനം വാണിയമ്പലം സ്‌കൂളിൽ ഹയർ സെക്കൻഡറി വിഭാഗം സബ് ജില്ലാ കൺവീനർ ഒ.വിനോദ് നിർവ്വഹിച്ചു. ബി.പി.സി എം. മനോജ് അദ്ധ്യക്ഷനായി. വാണിയമ്പലം ഗവ: ഹയർ സെക്കൻഡറി പ്രിൻസിപ്പൽ പി.ഉഷാകുമാരി, ആർ.പിമാരായ എം.മുഹമ്മദ് ബഷീർ, ഇ.പി. ജയേഷ്, ജാഫർ ചുങ്കത്ത് തുടങ്ങിയവർ ചടങ്ങിൽ സംസാരിച്ചു.