പി.എൻ.പണിക്കർ അനുസ്മരണം
തിരുവനന്തപുരം: 29-ാമത് പി.എൻ പണിക്കർ അനുസ്മരണവും ദേശീയ വായന / ഡിജിറ്റൽ വായനാദിനാഘോഷവും വായനാദിനമായ ജൂൺ 19ന് രാവിലെ 10.30 ന് സെന്റ് ജോസഫ് സ്കൂളിൽ മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. മന്ത്രി വി.ശിവൻകുട്ടി അദ്ധ്യക്ഷത വഹിക്കും. കുട്ടികൾ വായനാദിന പ്രതിജ്ഞ ചൊല്ലും. ദേശീയ തലത്തിൽ അംഗീകാരം ലഭിച്ച അദ്ധ്യാപകരെ ആദരിക്കും. വിദ്യാർത്ഥികൾ വായനാനുഭവം പങ്കുവയ്ക്കും. ഒരു മാസം നീണ്ടു നിൽക്കുന്ന പരിപാടികളിൽ വായന, ക്വിസ് മത്സര വിജയിക്ക് ഒരു ലക്ഷം രൂപയും പുസ്തകങ്ങളും സമ്മാനം ലഭിക്കും. കുട്ടികൾക്ക് കവിത, ഉപന്യാസം, പദമത്സരം, ചിത്രരചന തുടങ്ങിയ മത്സരങ്ങളും കൂട്ടയോട്ടം, ചർച്ചാ യോഗങ്ങൾ, സെമിനാറുകൾ എന്നിവയും സംഘടിപ്പിക്കും. തിരുവനന്തപുരം പൂജപ്പുര അക്ഷര ഗുരു സന്നിധിയിൽ ജൂൺ 19 മുതൽ ജൂലായ് 18 വരെ നടക്കുന്ന വിവിധ ചർച്ചാ യോഗങ്ങളിൽ വിദഗ്ദ്ധർ പങ്കെടുക്കുമെന്ന് സംഘാടകർ അറിയിച്ചു.
ടൈപ്പ് 1 പ്രമേഹമുള്ളവർക്ക്മുൻഗണന
തിരുവനന്തപുരം: ടൈപ്പ് 1 പ്രമേഹമുള്ളവർക്കും ഈ അസുഖമുള്ള കുട്ടികളുടെ മാതാപിതാക്കൾക്കും സർക്കാർ സർവീസിൽ നിയമനത്തിലും സ്ഥലംമാറ്റത്തിലും മുൻഗണന നൽകും. സെറിബ്രൽ പാൾസി ഉൾപ്പെടെയുള്ള ചലനവൈകല്യം, ഭേദമായ കുഷ്ഠം, അസാധാരണമായ പൊക്കക്കുറവ്, ആസിഡ് ആക്രമണത്തിനു വിധേയരായവർ, പേശീസംബന്ധമായ അസുഖമുള്ളവർ എന്നിവർക്കുള്ള മുൻഗണനയാണ് ഇനി ടൈപ്പ് 1 പ്രമേഹമുള്ളവർക്കും ലഭിക്കുകയെന്ന് സർക്കാർ ഉത്തരവിൽ വ്യക്തമാക്കി. ഓട്ടിസം, സെറിബ്രൽ പാൾസി എന്നീ രോഗങ്ങളുള്ള കുട്ടികളുടെ മാതാപിതാക്കൾക്കും ഈ മുൻഗണന നൽകിയിരുന്നു.
'ലിറ്റിൽ കൈറ്റ്സ്" പരീക്ഷ നാളെ
തിരുവനന്തപുരം : പൊതുവിദ്യാഭ്യാസവകുപ്പിന്റെ ലിറ്റിൽ കൈറ്റ്സ് ഐ.ടി ക്ലബിലേക്ക് എട്ടാം ക്ലാസ് വിദ്യാർത്ഥികളിൽ നിന്ന് അംഗങ്ങളെ തിരഞ്ഞെടുക്കുന്നതിനുള്ള അഭിരുചി പരീക്ഷ നാളെ നടക്കും. 2057 യൂണിറ്റുകളിൽ നിന്നായി 148618 വിദ്യാർത്ഥികൾ രജിസ്റ്റർ ചെയ്തിട്ടുണ്ട്. ഓരോ യൂണിറ്റിലും അഭിരുചി പരിക്ഷയിൽ മികച്ച നിലവാരം പുലർത്തുന്ന 20 മുതൽ 40 വരെ കുട്ടികൾക്കാണ് ലിറ്റിൽ കൈറ്റ്സിൽ അംഗത്വം ലഭിക്കുന്നത്. തെരഞ്ഞെടുക്കപ്പെടുന്ന വിദ്യാർത്ഥികളിൽ ലിറ്റിൽ കൈറ്റ്സ് കരിക്കുലം അടിസ്ഥാനമാക്കിയുള്ള പ്രവർത്തനം എട്ട്, ഒൻപത്, പത്ത് ക്ലാസുകളിലായി പൂർത്തിയാക്കുന്നവർക്ക് ഗ്രേഡ് സർട്ടിഫിക്കറ്റും ഇതിന്റെ അടിസ്ഥാനത്തിൽ എസ്.എസ്.എൽ.സി പരീക്ഷയ്ക്ക് ഗ്രേസ് മാർക്കും പ്ലസ് വൺ പ്രവേശനത്തിന് ബോണസ് പോയിന്റും ലഭിക്കും.