വാട്ട്സാപ് മെസേജിന്റെ പേരിലെ സസ്പെൻഷൻ മൗലികാവകാശ ലംഘനം
കൊച്ചി: കമ്പനിയിലെ സുരക്ഷ സംബന്ധിച്ച ആശങ്ക വാട്ട്സാപ് ഗ്രൂപ്പിൽ പങ്കുവച്ച ജീവനക്കാരനെതിരെ പൊതുമേഖലാ സ്ഥാപനം എഫ്.എ.സി.ടി സ്വീകരിച്ച അച്ചടക്ക നടപടി മൗലികാവകാശ ലംഘനമാണെന്ന് ഹൈക്കോടതി. ടെക്നീഷ്യൻ ടി.വി. സുജിത്തിന്റെ ഹർജിയിലാണ് ജസ്റ്റിസ് സതീഷ് നൈനാന്റെ ഉത്തരവ്.
കമ്പനിയിലെ 'ടെക്നീഷ്യൻ ഒഫീഷ്യൽ" എന്ന വാട്ട്സ്ആപ്പ് ഗ്രൂപ്പിലാണ് സുജിത്ത് പോസ്റ്റിട്ടത്. ഇത് അപകീർത്തികരമാണെന്നും ജീവനക്കാരിൽ അസ്വസ്ഥത സൃഷ്ടിക്കുമെന്നുമായിരുന്നു കമ്പനി നിലപാട്. വാട്സാപ് സന്ദേശത്തിന്റെയും ഫാക്ട് കൊച്ചിൻ ഡിവിഷൻ അമോണിയ പ്ളാന്റിൽ അനാവശ്യമായി കയറിയതിന്റെയും പേരിൽ 2019 ജൂലായ് 31ന് സുജിത്തിനെ സസ്പെൻഡ് ചെയ്തു. പിന്നീട് മാപ്പപേക്ഷ സ്വീകരിച്ച് താക്കീത് നൽകി തിരിച്ചെടുത്തു.
'താക്കീത് "ഏറ്റവും ലഘുവായ ശിക്ഷയാണെന്നും അതിൽ ഇടപെടേണ്ടതില്ലെന്നും ഹൈക്കോടതി ഉത്തരവിൽ പറഞ്ഞു. എന്നാൽ വാട്ട്സാപ് ഗ്രൂപ്പിൽ സുരക്ഷാ ആശങ്ക പങ്കുവച്ചതിന് സ്വീകരിച്ച നടപടി മൗലികാവകാശ ലംഘനപരിധിയിൽ വരുമെന്ന് വ്യക്തമാക്കിയ കോടതി ഹർജി തീർപ്പാക്കി.