ഇക്വഡോറടച്ച് വെനിസ്വേല

കാലിഫോർണിയ: കോപ്പ അമേരിക്ക ഗ്രൂപ്പ് ബിലെ മത്സരത്തിൽ ഇക്വഡോറിനെതിരെ ഒരു ഗോളിന് പിന്നിൽ നിന്ന ശേഷം രണ്ട് ഗോൾ തിരിച്ചടിച്ച് തകർപ്പൻ ജയം നേടി വെനിസ്വല. കാഡിസും ബെല്ലോയുമാണ് വെനിസ്വേലയ്ക്കായി ഗോളുകൾ നേടിയത്. ജെറമി സർമിയന്റൊയാണ് ഇക്വഡോറിന്റെ സ്കോറർ. 22-ാം മിനിട്ടിൽ സൂപ്പർ താരം എന്നാർ വലൻസിയ ചുവപ്പ് കാർഡ് കണ്ട് പുറത്തായതിനെത്തുടർന്ന് പത്ത് പേരുമായി കളിക്കേണ്ടി വന്നത് ഇക്വഡോറിന് തിരിച്ചടിയാവുകയായിരുന്നു. വാർ പരിശോധനയ്ക്ക് ശേഷമാണ് വലൻസിയയ്ക്ക് ചുവപ്പ് കാർഡ് കിട്ടിയത്. 40-ാം മിനിട്ടിൽ സർമിയന്റൊ ഇക്വഡോറിന് ലീഡ് സമ്മാനിച്ചു. ഇടവേളയ്ക്ക് പിരിയുമ്പോൾ ഇക്വഡോർ 1-0ത്തിന്മുന്നിലായിരുന്നു. എന്നാൽ രണ്ടാം പകുതിയിൽ 64-ാം മിനിട്ടിൽ കാഡിസും 74-ാം മിനിട്ടിൽ ബെല്ലോയും നേടിയ ഗോളുകളിലൂടെ വെനിസ്വേല ജയം സ്വന്തമാക്കുകയായിരുന്നു.