5 വീടുകളിൽ വെള്ളം കയറി
കടലുണ്ടി:കടലുണ്ടി ഗ്രാമ പഞ്ചായത്തിന്റെ തീരപ്രദേശങ്ങളിൽ ശക്തമായ കടലാക്രമണം. 10 മീറ്ററോളം ഉയരത്തിലാണ് തിരമാലകൾ അടിച്ചുകയറിയത്. കടലുണ്ടിക്കടവ് മേഖലയിൽ 5 വീടുകളിൽ വെള്ളം കയറി. കല്ലും മാലിന്യവും അടിഞ്ഞതോടെ തീരദേശ റോഡിൽ ഗതാഗതം താറുമാറായി. ബൈത്താനി നഗർ തീരദേശ റോഡിൽ മുട്ടറ്റം ഉയരത്തിൽ വെള്ളം കയറി. ചാലിയം കോട്ടക്കണ്ടി, കടുക്ക ബസാർ, ബൈത്താനി നഗർ, കപ്പലങ്ങാടി, വലിയാൽ, വാക്കടവ്, കടലുണ്ടിക്കടവ് എന്നിവിടങ്ങളിൽ സ്ഥിതി രൂക്ഷമായിരുന്നു. ബൈത്താനി നഗർ, കപ്പലങ്ങാടി വലിയാൽ പരിസരങ്ങളിൽ കടൽഭിത്തി ഉയരം കുറവാണ്. ഇവിടെ ചെറിയൊരു തിരയടിച്ചാൽ വെള്ളം കയറുന്ന സ്ഥിതിയാണ്. വാക്കടവ് മുതൽ കടലുണ്ടിക്കടവ് വരെയുള്ള ഭാഗങ്ങളിൽ പലയിടത്തും ഭിത്തി തകർന്നു. ഗ്രാമ പഞ്ചായത്ത് പ്രസിഡന്റ് വി.അനുഷ, പഞ്ചായത്ത് അംഗം ഹക്കീമ മാളിയേക്കൽ, ഇറിഗേഷൻ അസി.എൻജിനിയർ എ.ബിനേഷ് എന്നിവർ കടൽക്ഷോഭമുണ്ടായ പ്രദേശങ്ങൾ സന്ദർശിച്ചു.