കല കൊലക്കേസ് ; അനിൽ ക്വട്ടേഷൻ നൽകി; സംഘം ഏറ്റെടുത്തില്ല

മാന്നാർ: 15 വർഷം മുൻപു കാണാതായ കലയെ കൊലപ്പെടുത്താൻ ഭർത്താവ് അനിൽ ക്വട്ടേഷൻ നൽകിയിരുന്നതായി ബന്ധുവിന്റെ വെളിപ്പെടുത്തൽ.

നാട്ടിലുള്ള ഒരു സംഘത്തിന് അനിൽ ക്വട്ടേഷൻ നൽകിയെങ്കിലും അവർ ഏറ്റെടുത്തില്ല. കലയുടെ സഹോദരൻ നടത്തിയ അന്വേഷണത്തിലാണ് ഇതു കണ്ടെത്തിയതെന്ന് മാതൃസഹോദരി ശോഭന മാദ്ധ്യമങ്ങളോട് പറഞ്ഞു. അറിയാവുന്ന കുട്ടി ആയതു കൊണ്ടാണ് ക്വട്ടേഷൻ എടുക്കാതിരുന്നതെന്നും മറ്റാർക്കെങ്കിലും ക്വട്ടേഷൻ കൊടുത്തേക്കുമെന്നും അവർ പറഞ്ഞിരുന്നു.

ഭർത്താവിന്റെ വീട്ടിൽ കലയ്ക്ക് നിരന്തരം പീഡനങ്ങൾ അനുഭവിക്കേണ്ടി വന്നിരുന്നു. ജീവിച്ചിരുന്നെങ്കിൽ ഒരിക്കലെങ്കിലും മകനെ കാണാൻ ഉറപ്പായും അവൾ വരുമായിരുന്നെന്നും ശോഭന പറഞ്ഞു.

‘‘അനിലിനൊപ്പം പോകുമ്പോൾ കലയ്ക്ക് 20 വയസ്സേ പ്രായം കാണൂ. പ്ലസ് ടു കഴിഞ്ഞിട്ടേയുണ്ടായിരുന്നുള്ളൂ. ഞങ്ങൾ വിവാഹം ക‌ഴിച്ചു നൽകില്ലെന്ന് അറിയിച്ചതോടെ അനിൽ കലയെ വന്നു കൊണ്ടുപോവുകയായിരുന്നു. അനിലിന്റെ ബന്ധുക്കളുടെ സാന്നിധ്യത്തിലാണ് വിവാഹം നടത്തിയത്. കല മറ്റൊരാളുമായി സ്നേഹത്തിലാണെന്ന് ഇതിനിടയ്ക്ക് അനിൽ പറഞ്ഞിരുന്നു. അനിലിന്റെ അമ്മ എന്നും കലയുമായി ബഹളമുണ്ടാക്കുമായിരുന്നു. പക്ഷേ അച്ഛനു സ്നേഹമായിരുന്നു'- ശോഭന പറഞ്ഞു.