കൊച്ചിയിൽ  റെയിൽവേ  ട്രാക്കിലേക്ക്  മരം  ഒടിഞ്ഞുവീണു; വെെദ്യുതി ലെെനിൽ തട്ടി തീപിടിച്ചു

കൊച്ചി: എറണാകുളത്ത് റെയിൽവേ ട്രാക്കിലേക്ക് മരം ഒടിഞ്ഞുവീണു. ഇതേത്തുടർന്ന് ട്രെയിൻ ഗതാഗതം തടസ്സപ്പെട്ടു. സ്വകാര്യ വ്യക്തിയുടെ കേസിൽപെട്ട് കിടക്കുന്ന ഭൂമിയിലെ മരമാണ് പച്ചാളം ലൂർദ്ദ് ആശുപത്രി പരിസരത്തെ പാളത്തിലേക്ക് മറിഞ്ഞ് വീണത്.

തുടർന്ന് റെയിൽവേയുടെ വെെദ്യുതി ലെെനിൽ മരം തട്ടി തീപിടിച്ചു. വലിയ ശബ്‌ദത്തോടെയാണ് മരം ഒടിഞ്ഞുവീണതെന്ന് ദൃക്‌സാക്ഷികൾ പറയുന്നു. മഴയിൽ മരം നനഞ്ഞിരുന്നതിനാൽ തീ ആളിക്കത്തിയില്ല. ട്രെയിൻ ഗതാഗതം താൽക്കാലികമായി നിർത്തിവച്ചിരിക്കുകയാണ്. വേണാട്, മംഗള എക്‌സ്പ്രസുകൾ പിടിച്ചിട്ടുണ്ട്. കോട്ടയം ഭാഗത്തേക്കുള്ള ട്രെയിൻ ഗതാഗതം പുനഃസ്ഥാപിച്ചു. തൃശ്ശൂർ ഭാഗത്തേക്കുള്ള ട്രെയിൻ ഗതാഗതം ഉടൻ ആരംഭിക്കുമെന്നാണ് സൂചന.