അനധികൃത ഇറച്ചിവ്യാപാരം അവസാനിപ്പിക്കണം
Wednesday 10 July 2024 12:59 AM IST
പരവൂർ: പരവൂർ നഗരസഭയിലെ അനധികൃത മാട്ടിറച്ചി വ്യാപാരം തടയണമെന്ന് സ്ഥിരം സമിതി അദ്ധ്യക്ഷനും എൽ.ഡി.എഫ് പാർലമെന്ററി പാർട്ടി ലീഡറുമായ എസ്. ശ്രീലാൽ പറഞ്ഞു. നഗരസഭയുടെ നികുതി വരുമാനത്തെപ്പോലും ബാധിക്കുന്ന രീതിയിൽ അനധികൃത കശാപ്പും വ്യാപാരവും വർദ്ധിച്ചു. നഗരസഭ മാർക്കറ്റിലെ ഇറച്ചിസ്റ്റാൾ ഇതുവരെ ലേലം ചെയ്തിട്ടില്ല. മേയിൽ നടന്ന കൗൺസിൽ യോഗത്തിൽ എൽ.ഡി.എഫ് വിഷയം ഉന്നയിച്ചിരുന്നു. എന്നാൽ നടപടി ഉണ്ടായില്ല. 15 വർഷം മുൻപുവരെ മത്സരലേലം വഴി 24 ലക്ഷം രൂപയോളം നഗരസഭയ്ക്ക് ലഭിച്ചിട്ടുണ്ട്. എന്നാൽ അനധികൃത കശാപ്പും വില്പനയും വ്യാപകമായതോടെ ചന്തയിലെ വ്യാപാരം കുത്തനെ ഇടിഞ്ഞു. കിഫ്ബി ഫണ്ട് ഉപയോഗിച്ച് നിർമ്മിക്കാനുദ്ദേശിക്കുന്ന ആധുനിക ചന്തയുടെ പ്രസക്തി നഷ്ടപ്പെടുന്ന രീതിയിലാണ് ഇറച്ചിവ്യാപാരവും മീൻവില്പനയും അനധികൃതമായി നടക്കുന്നതെന്നും അദ്ദേഹം പറഞ്ഞു.