മോഹൻലാൽ കേരള ക്രിക്കറ്റ് ലീഗ് അംബാസഡർ
കൊച്ചി: കേരള ക്രിക്കറ്റ് അസോസിയേഷൻ(കെ.സി.എ) സംഘടിപ്പിക്കുന്ന പ്രൊഫഷണൽ ക്രിക്കറ്റ് ലീഗായ കേരള ക്രിക്കറ്റ് ലീഗിന്റെ (കെ.സി.എൽ) ബ്രാൻഡ് അംബാസഡറായി സൂപ്പർതാരം മോഹൻലാൽ എത്തുന്നു.
ഏറെ അഭിമാനത്തോടെയും സന്തോഷത്തോടെയുമാണ് കെ.സി.എല്ലിന്റെ ഭാഗമാകു ന്നതെന്ന് മോഹൻലാൽ പറഞ്ഞു.
ഇതിലൂടെ ദേശീയ ശ്രദ്ധയും മികച്ച അവസരങ്ങളും നേടാനുള്ള അവസരമാണ് കളിക്കാർക്ക് ലഭിക്കുന്നത്.
ഐ.പി.എൽ മാതൃകയിൽ മലയാളി താരങ്ങൾ ഉൾപ്പെട്ട ആറ് ടീമുകൾ അണിനിരക്കുന്ന ട്വന്റി20 ക്രിക്കറ്റ് ലീഗിന്റെ ആദ്യ സീസൺ സെപ്തംബർ രണ്ട് മുതൽ 19 വരെ തിരുവനന്തപുരം കാര്യവട്ടത്തെ സ്പോർട്സ് ഹബ് സ്റ്റേഡിയത്തിലാണ് സംഘടിപ്പിക്കുന്നത്. 60 ലക്ഷം രൂപയാണ് ലീഗിലെ ആകെ സമ്മാനത്തുക. പകലും രാത്രിയുമായി രണ്ട് മത്സരങ്ങളാണ് ഓരോ ദിവസവും ഉണ്ടാകുക. ലീഗിന്റെ ഇടവേളയിൽ മലയാളി വനിത ക്രിക്കറ്റ് താരങ്ങൾ അണിനിരക്കുന്ന പ്രദർശന മത്സരവും സംഘടിപ്പിക്കും.
ടീം ഫ്രാഞ്ചൈസികളുടെ ഉടമസ്ഥാവകാശം സ്വന്തമാക്കുന്നതിനുള്ള താൽപ്പര്യപത്രം സമർപ്പിക്കുവാനുള്ള അവസരം ജൂലായ് 15 വരെയാണ്. ഒട്ടേറെ മുൻനിര കമ്പനികളും ബ്രാൻഡുകളും ഫ്രാഞ്ചൈസികൾ ആരംഭിക്കുന്നതിനും ടീമുകളെ സ്പോൺസർ ചെയ്യുന്നതിനുമായി താൽപര്യം പ്രകടിപ്പിച്ചിട്ടുണ്ടെന്ന് കെ.സി.എൽ ചെയർമാൻ നാസിർ മച്ചാൻ അറിയിച്ചു. ടീം അംഗങ്ങളെ തിരഞ്ഞെടുക്കാൻ താരലേലം ഉണ്ടാകും.
മോഹൻലാലിന്റെ പങ്കാളിത്തം ഏറെ പ്രതീക്ഷ നൽകുന്നതാണെന്ന് കെ.സി.എ പ്രസിഡന്റ് ജയേഷ് ജോർജും സെക്രട്ടറി വിനോദ് എസ്.കുമാറും പറഞ്ഞു.