കെഎൽ രാഹുൽ ലക്നൗ വിടും; ഡൽഹിയെ കെെവിട്ട് റിഷഭ് പന്ത് ധോണിയ്ക്ക് പകരക്കാരനാകും ?
ന്യൂഡൽഹി: ഇന്ത്യൻ പ്രീമിയർ ലീഗ് (ഐപിഎൽ) 2025 മെഗാ ലേലത്തിന് മുന്നോടിയായി ലക്നൗ സൂപ്പർ ജയന്റ്സ് (എൽഎസ്‌ജി) ക്യാപ്റ്റൻ കെ എൽ രാഹുൽ ടീം വിടാൻ ഒരുങ്ങുന്നതായി റിപ്പോർട്ട്. കഴിഞ്ഞ മൂന്ന് സീസണുകളിൽ രണ്ടിലും രാഹുൽ ഫ്രാഞ്ചെെസിയെ പ്ലേ ഓഫിലേക്ക് നയിച്ചിരുന്നു. കഴിഞ്ഞ സീസണിലൊടുവിൽ ഹെെദരാബാദിനോട് തോറ്റതിന് ശേഷം ലക്നൗ ടീം ഉടമ സഞ്ജീവ് ഗോയങ്കയുമായുണ്ടായ അസ്വസ്ഥതകളാണ് ഇതിന് കാരണമെന്നാണ് പുറത്തുവരുന്ന റിപ്പോർട്ട്.
അതേസമയം, വിക്കറ്റ് കീപ്പർ ബാറ്റർ റിഷഭ് പന്ത് ഐപിഎൽ ടീമായ ഡൽഹി ക്യാപിറ്റൽസ് വിടാനൊരുങ്ങുകയാണെന്നുള്ള റിപ്പോർട്ടുകൾ ശക്തമാകുന്നുണ്ട്.മെഗാ ലേലത്തിന് മുന്നോടിയായി ടീം ക്യാപ്ടൻ കൂടിയായ പന്തിനെ ഡൽഹി റിലീസ് ചെയ്യുമെന്ന് ദേശീയ മാദ്ധ്യമമായ ദൈനിക് ജാഗരൺ റിപ്പോർട്ട് ചെയ്തു.
ഡൽഹി വിടുന്ന പന്ത് ചെന്നൈ സൂപ്പർ കിംഗ്സിലേക്ക് ചേക്കേറിയേക്കുമെന്നാണ് വിവരം. എം എസ് ധോണി വിരമിക്കാനൊരുങ്ങുന്ന സാഹചര്യത്തിൽ വിക്കറ്റ് കീപ്പർ ബാറ്ററെ തേടുന്ന ചെന്നൈയ്ക്ക് മികച്ച ഓപ്ഷനാണ് പന്ത്. ഡൽഹിക്കായി ഏറ്റവും കൂടുതൽ റൺസ് നേടിയതും മത്സരങ്ങൾ കളിച്ചതുമായ താരമാണ് പന്ത്. 2018 മുതൽ ടീമിന്റെ പരിശീലകനായിരുന്ന മുൻ ഓസീസ് നായകൻ റിക്കി പോണ്ടിംഗുമായുള്ള കരാർ ഡൽഹി അവസാനിപ്പിച്ചിരുന്നു. റിക്കി പോണ്ടിംഗ് രാജിവച്ചതിന് പിന്നാലെയാണ് പന്തും ഡൽഹി വിടുന്നത്.