മഴ

മഴ

സന്ധ്യ സാന്റെഷ്

കാതുകൾക്കിമ്പമായ് മലകളിൽ തട്ടി പ്രതിദ്ധ്വനിച്ച് മഴയുടെയൊരു വരവുണ്ട്.

നോക്കിനിൽക്കുന്നേരം അകലെനിന്നുമെത്തുന്ന മഴയുടെ വിതുമ്പലുകൾ നമ്മളിലും പതിക്കും.

പിന്നെ, ഒരു ആർത്തനാദം തന്നെയാവും പരാതികൾ, പരിഭവങ്ങൾ പറഞ്ഞുകൊണ്ടേയിരിക്കും.

അലമുറകളിൽ തുടങ്ങി മെല്ലെമെല്ലെ നേർത്ത തേങ്ങലായ് പെയ്‌തൊഴിയും.

സൂര്യതാപത്തിലുരുകുന്ന ഭൂമി അതേറ്റെടുക്കും ആ കുളിരിൽ മണ്ണും പ്രണയിനിയായിടും...

കാലങ്ങളായി ഞാനും ഈ മഴയിൽ കുളിരുന്നു. ഒരു മഴയിൽ വിട്ടകന്നവർ എന്നോടു കുശലം ചൊല്ലുന്നു.

നിനക്ക് ഭ്രാന്തെന്നു ചൊല്ലുന്നവർ ഏറെയെങ്കിലും ഞാനിന്നും ഈ മഴ നനയുന്നു...

എന്റെ കണ്ണുനീരലിയിക്കാൻ ചിരികളിൽ പങ്കുചേരാൻ എനിക്കുവേണ്ടിയാകും ഈ മഴയെന്ന് ഞാൻ നിനച്ചിടുന്നു.

2

എരിക്കാം,​ വളമാക്കാം

- ഭരതന്നൂർ ശിവരാജൻ

ഉള്ളതു ചപ്പും ചവറുകളുമതു -

മട്ടുള്ളവകൾ പലതും തന്നെ

എറിയരുതു പൊതു വീഥികളിൽ പി-

ന്നതു പോലുള്ള സ്ഥലങ്ങളിലൊന്നും

ആൾകൾക്കതു പല പല വിധമത്രേ

ദുരിത,​ മുപദ്രവം ഓർമ്മയിൽ വേണം

എന്തേ പിന്നിതു മാറ്റാൻ മാർഗ്ഗം,​

ചിന്തയിൽ ഗാന്ധിമൊഴി ഓർക്കാം

ബന്ധിപ്പിച്ചിവ, തീയിലെരിക്കാം

വെന്തവകിട്ടും ചാരമെടുക്കാം

ഉള്ളതു ചെടികൾക്കെല്ലാം വളമായ്

നല്ലതു പോലെ ഇട്ടുകൊടുക്കാം

വളരട്ടെ അവ, ഇടരൊഴിവൊന്നും

കലരാതെ ഫലമെമ്പാടായി!