വാഹനം തടഞ്ഞ് കൂളിംഗ് പേപ്പർ കീറരുതെന്ന് മന്ത്രി

തിരുവനന്തപുരം: വാഹനങ്ങളിൽ കൂളിംഗ് പേപ്പർ ഉപയോഗിക്കാമെന്ന ഹൈക്കോടതി വിധി മോട്ടർ വാഹനവകുപ്പും പൊലീസും കർശനമായി പാലിക്കണമെന്ന് മന്ത്രി കെ.ബി. ഗണേശ്‌കുമാർ. വഴിയിൽ വാഹനം തടഞ്ഞുനിർത്തി കൂളിംഗ് ഫിലിം വലിച്ചുകീറുന്നത് ഉടമകളെ അപമാനിക്കുന്നതിനു തുല്യമാണെന്നും മന്ത്രി പറഞ്ഞു.

മുൻഗ്ലാസിൽ 70 ശതമാനവും സൈഡ് ഗ്ലാസിൽ 50 ശതമാനവും വിസിബിലിറ്റി മതിയെന്ന കോടതി നിർദ്ദേശം കൃത്യമായി പാലിക്കണം. കുഞ്ഞുങ്ങളുമായി യാത്ര ചെയ്യുന്നവർ, ക്യാൻസർ രോഗികൾ എന്നിവർക്ക് ഇപ്പോഴത്തെ ചൂട് അസഹനീയമാണ്. നിയമം പാലിക്കാതെ കട്ടി കൂടിയ ഫിലിം ഒട്ടിച്ചിട്ടുണ്ടെങ്കിൽ ജനത്തെ ബുദ്ധിമുട്ടിക്കാതെ നടപടിയെടുക്കാമെന്നും മന്ത്രി പറഞ്ഞു.