ഐ.ബി ഉദ്യോഗസ്ഥയുടെ മരണത്തിനു പിന്നിൽ സുഹൃത്ത് സുകാന്തിന്റെ സാമ്പത്തിക ചൂഷണം

പൊലീസ് അന്വേഷണം പിതാവിന്റെ വെളിപ്പെടുത്തലിന്റെ അടിസ്ഥാനത്തിൽ

തിരുവനന്തപുരം/കോന്നി : തിരുവനന്തപുരം അന്താരാഷ്ട്ര വിമാനത്താവളത്തിലെ എമിഗ്രേഷൻ ഇന്റലിജൻസ് ബ്യൂറോ ഉദ്യോഗസ്ഥയായിരുന്ന മേഘയുടെ (25)​ മരണത്തിൽ ആൺ സുഹൃത്തിനെ പൊലീസ് ചോദ്യം ചെയ്യും. അതിനായി കൊച്ചി ഐ.ബി യൂണിറ്റിന് നോട്ടീസ് നൽകും. കൊച്ചി​യി​ലെ ഐ. ബി ഉദ്യോഗസ്ഥൻ സുകാന്ത് സുരേഷ് സാമ്പത്തികമായി മേഘയെ ചൂഷണം ചെയ്തിരുന്നതായി പിതാവ് മധുസൂദനൻ ഇന്നലെ വെളിപ്പെടുത്തിയിരുന്നു.

ട്രെയി​ൻ തട്ടി​ മരി​ച്ച നി​ലയി​ൽ കണ്ടെത്തി​യ മേഘയുടെ അക്കൗണ്ടിൽ 80 രൂപ മാത്രമാണ് ഉണ്ടായിരുന്നത്. കഴി​ഞ്ഞ ഫെബ്രുവരി 28ന് ലഭിച്ച ശമ്പളവും സുഹൃത്തായ സുകാന്തി​ന്റെ അക്കൗണ്ടിലേക്ക് ട്രാൻസ്ഫർ ചെയ്തിരുന്നു. ഭക്ഷണം കഴിക്കാൻപോലും പണമി​ല്ലെന്ന് കൂടെ ജോലി ചെയ്തിരുന്നവരോട് മേഘ പലപ്പോഴും പറഞ്ഞിരുന്നു. പലതവണ സുകാന്തി​ന് പണം ട്രാൻസ്ഫർ ചെയ്തിരുന്നതായി ബാങ്ക് സ്റ്റേറ്റ്മെന്റിൽ വ്യക്തമാണ്. ബാങ്ക് സ്റ്റേറ്റ്മെന്റ്, എ.ടി.എം കാർഡ് എന്നിവ മേഘയുടെ പിതാവ് പൊലീസിനു കൈമാറി.

പണം വീട്ടിലേക്ക് അയച്ചി​രുന്നതായാണ് മേഘ സഹപ്രവർത്തകരോട് പറഞ്ഞിരുന്നത്. എന്നാൽ,​ അച്ഛനും അമ്മയും പണം ആവശ്യപ്പെട്ടിരുന്നില്ല. മേഘയുടെ അക്കൗണ്ടിലേക്ക് ചെലവിനായി ചെറിയ തുകകൾ സുകാന്ത് ട്രാൻസ്ഫർ ചെയ്തിട്ടുമുണ്ട്. മേഘ അടുത്തകാലത്തായി അധികം ആരോടും സംസാരിക്കാറില്ലായിരുന്നെന്നും സഞ്ചയനത്തിന് വീട്ടിലെത്തിയ സഹപ്രവർത്തകരി​ൽ നി​ന്നാണ് കൂടുതൽ വി​വരങ്ങൾ അറിഞ്ഞ​തെന്നും പിതാവ് മാദ്ധ്യമങ്ങളോട് പറഞ്ഞു. കഴി​ഞ്ഞ 24നാണ് അ​തി​രു​ങ്ക​ൽ​ ​കാ​ര​യ്ക്ക​കു​ഴി​ ​പൂ​ഴി​ക്കാ​ട് വീട്ടി​ൽ മേഘയെ തി​രുവനന്തപുരം ചാക്കയിൽ ട്രെയി​ൻ തട്ടി​ മരി​ച്ച നി​ലയി​ൽ കണ്ടെത്തി​യത്. ഫോണിൽ സംസാരിച്ച് ട്രാക്കിലൂടെ നടക്കുകയായിരുന്ന മേഘ ട്രെയിൻ വരുന്നതുകണ്ട് പെട്ടെന്ന് ട്രാക്കിനുകുറകെ തലവച്ച് കിടക്കുകയായിരുന്നു എന്നാണ് ലോക്കാ പൈലറ്റിന്റെ മൊഴി.