ക്രൂഡ് വിലയിലെ ഇടിവ് ഉപഭോക്താക്കൾക്ക് ലഭിക്കില്ല

തീരുവ കൂട്ടിയേക്കും

കൊച്ചി: അന്താരാഷ്ട്ര വിപണിയിൽ ക്രൂഡോയിൽ വില മൂക്കുകുത്തിയെങ്കിലും ആഭ്യന്തര ഉപഭോക്താക്കൾക്ക് ഗുണമാകില്ല. ഇന്നലെ ബ്രെന്റ് ക്രൂഡിന്റെ വില ബാരലിന് 59 ഡോളറിലേക്കാണ് താഴ്ന്നത്. പുതിയ സാഹചര്യത്തിൽ വരുമാന നഷ്‌ടം നേരിടാൻ കേന്ദ്ര സർക്കാർ എക്സൈസ് തീരുവ ഇനിയും കൂട്ടുമെന്നാണ് വിലയിരുത്തുന്നത്. സർക്കാരിന് വരുമാന നഷ്ടം ഉണ്ടാകാതിരിക്കാനും സാമ്പത്തിക ഞെരുക്കം ഒഴിവാക്കാനുമാണ് തീരുവ കൂട്ടുന്നത്. തീരുവ വർദ്ധനയുടെ ബാദ്ധ്യത പൊതുമേഖലാ എണ്ണക്കമ്പനികൾ ഏറ്റെടുക്കുന്നതിനാൽ പെട്രോളിന്റെയും ഡീസലിന്റെയും ചില്ലറ വില്പന വില കൂടില്ലെന്നതാണ് ആശ്വാസം.

രാജ്യാന്തര വിപണിയിൽ ബ്രെന്റ് ക്രൂഡ് വില ഇടിഞ്ഞതിനാൽ പെട്രോൾ, ഡീസൽ ഉത്പാദന ചെലവ് ഗണ്യമായി കുറഞ്ഞു.കഴിഞ്ഞ വർഷം മാർച്ച് 14ന് ശേഷം ഇന്ത്യയിൽ പെട്രോൾ, ഡീസൽ വില കുറച്ചിട്ടില്ല. ജനുവരി മുതൽ മാർച്ച് വരെയുള്ള മൂന്ന് മാസങ്ങളിൽ പൊതുമേഖല കമ്പനികളായ ബി.പി.സി.എൽ, ഐ.ഒ.സി, എച്ച്.പി.സി.എൽ എന്നിവ മികച്ച പ്രവർത്തന ലാഭമാണ് നേടിയത്.