മരം ഒടിഞ്ഞു വീഴുന്നത് കണ്ട് സഹോദരനെ രക്ഷിക്കാനെത്തി,​ തിരുവനന്തപുരത്ത് രണ്ടാംക്ലാസുകാരിക്ക് ദാരുണാന്ത്യം

നാവായിക്കുളം : നാവായിക്കുളത്ത് അയൽവാസിയുടെ പുരയിടത്തിലെ മരം ഒടിഞ്ഞു വീണ് രണ്ടാം ക്ലാസുകാരി മരിച്ചു. നാവായിക്കുളം കുടവൂർ ലക്ഷം കോളനിയിൽ എൻ. എൻ. ബി ഹൗസിൽ സഹദിന്റയും നാദിയയുടെയും മകൾ റിസ്‌വാനയാണ് (7) മരിച്ചത്. ഇന്ന് രാവിലെ പത്തു മണിയോടെയായിരുന്നു സംഭവം.

റിസ്വാനയുടെ ഒന്നര വയസുള്ള സഹോദരൻ വീടിനു പിറകിൽ കളിച്ചു കൊണ്ടിരിക്കെ മരം ഒടിയുന്ന ശബ്ദം കേട്ട് രക്ഷിക്കാൻ റിസ്‌വാന ഓടിയെത്തുകയായിരുന്നു. ഇതിനിടെ മരം റിസ്‌വാനയുടെ ദേഹത്ത് വീണാണ് അപകടം സംഭവിച്ചതെന്നാണ് വിവരം. സഹോദരനെ അത്ഭുതകരമായി രക്ഷപെടുത്തുകയും ചെയ്തു. ഗുരുതരമായി പരിക്കേറ്റ റിസ് വാനയെ അടുത്തുള്ള സ്വകാര്യ ആശൂപത്രിയിലും തുടർന്ന് തിരുവനന്തപുരത്തെ ആശുപത്രിയിലും പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.