പെരിങ്ങരയിൽ വീട്ടിൽ കുടുങ്ങിയ ആറംഗ കുടുംബത്തെ രക്ഷപ്പെടുത്തി 

തിരുവല്ല : വെള്ളപ്പൊക്കത്തിൽ ഒറ്റപ്പെട്ടുപോയ വീട്ടിൽ നിന്ന് വൃദ്ധ അടക്കമുള്ള ആറംഗ കുടുംബത്തെ അഗ്നിരക്ഷാസേനയെത്തി രക്ഷപ്പെടുത്തി. പെരിങ്ങര പഞ്ചായത്ത്‌ പതിനാലാം വാർഡിൽ ചാത്തങ്കരി വൈ എം സി എയ്ക്ക് സമീപം പുതുപ്പറമ്പിൽ വീട്ടിൽ റോസമ്മ ആൻഡ്രൂസ് (86), മക്കളായ ആലീസ് രാജു (53), ജോയ് മോൻ (46), ജോയിയുടെ ഭാര്യ ജോളി (42), ജോയ് മോന്റെ മക്കളായ ജോയൽ ജോയ് (14), റീമ ജോയ് (15) എന്നിവരെയാണ് ഇന്നലെ ഉച്ചയ്ക്ക് 12 മണിയോടെ തിരുവല്ലയിൽ നിന്നെത്തിയ അഗ്നിരക്ഷാസേന ഉദ്യോഗസ്ഥർ രക്ഷപ്പെടുത്തിയത്. പ്രധാന റോഡിൽ നിന്ന് ഒരു കിലോമീറ്ററോളം അകലെയുള്ള വീട്ടിൽ നിന്ന് ഡിങ്കി ബോട്ട് ഉപയോഗിച്ചാണ് രക്ഷാപ്രവർത്തനം നടത്തിയത്. അഗ്നിരക്ഷാസേന പൊടിയാടിയിൽ എത്തിച്ച കുടുംബം ബന്ധു വീട്ടിലേക്ക് പോയി.