എ.ജി.ആർ: ടെലികോം കമ്പനികളുടെ തിരിച്ചടിക്ക് പുതിയ പേര്

കൊച്ചി: വരുമാനക്കുറവ് മൂലം പ്രതിസന്ധിയിലായ ടെലികോം കമ്പനികൾക്കുമേൽ കൂടുതൽ തിരിച്ചടിയുമായി പുതിയ സാമ്പത്തിക ബാദ്ധ്യത വരുന്നു. കമ്പനികളുടെ മൊത്തം വരുമാനം കണക്കാക്കി (അഡ്‌ജസ്‌റ്രഡ് ഗ്രോസ് റെവന്യൂ - എ.ജി.ആർ)​,​ അധിക സ്‌പെക്‌ട്രം ഉപയോഗ ഫീസ് നൽകണമെന്ന് കേന്ദ്രം നിർദേശിച്ചിരുന്നു. ഇതു സംബന്ധിച്ച കേസ് സുപ്രീം കോടതിയുടെ പരിഗണനയിലാണ്.

സുപ്രീം കോടതി ഉത്തരവ് സർക്കാരിന് അനുകൂലമായാൽ അധിക സ്‌പെക്‌ട്രം ഉപയോഗ ഫീസായി ടെലികോം കമ്പനികൾ 40,​970 കോടി രൂപ സർക്കാരിന് നൽകേണ്ടി വരും. എ.ജി.ആറിൽ കമ്പനികളുടെ മൊത്തം വരുമാനം ഉൾപ്പെടുമെന്നാണ് സർക്കാരിന്റെ വാദം. എന്നാൽ,​ ടെലികോം സേവനത്തിൽ നിന്നുള്ള വരുമാനം മാത്രമേ കണക്കാക്കാവൂ എന്നാണ് കമ്പനികൾ ആവശ്യപ്പെടുന്നത്. ഇതു സംബന്ധിച്ച സുപ്രീം കോടതി വിധി ഉടനുണ്ടായേക്കും.

അധിക സ്‌പെക്‌ട്രം ഉപയോഗത്തിൽ ഏറ്റവും ഉയർന്ന ബാദ്ധ്യത ഭാരതി എയർടെല്ലിനാണെന്നാണ് കണക്കുകൾ സൂചിപ്പിക്കുന്നത്; 22,​943 കോടി രൂപ. 11,​004 കോടി രൂപയാണ് രാജ്യത്തെ ഏറ്റവും വലിയ ടെലികോം കമ്പനിയായ വൊഡാഫോൺ-ഐഡിയയ്ക്ക് ബാദ്ധ്യത. എയർസെൽ (2,​007 കോടി രൂപ)​,​ റിലയൻസ് കമ്മ്യൂണിക്കേഷൻസ് (3,​533 കോടി രൂപ)​,​ റിലയൻസ് ജിയോ (28 കോടി രൂപ)​ എന്നിങ്ങനെയാണ് മറ്റു പ്രമുഖ കമ്പനികളുടെ ബാദ്ധ്യത.