'ഈ അനുഭവങ്ങൾ സമ്മാനിച്ചതിന് പ്രശാന്ത് നായർക്ക് നന്ദി'; നാസ സ്‌പേസ് സെന്ററിൽ നിന്നുള്ള ചിത്രങ്ങൾ പങ്കുവച്ച് ലെന
നാസ സ്‌പേസ് സെന്ററിൽ നിന്നുള്ള ചിത്രങ്ങൾ ഇൻസ്റ്റഗ്രാമിൽ പങ്കുവച്ച് നടി ലെന. ഇത്രയും അതിഗംഭീരമായ അനുഭവങ്ങൾ സമ്മാനിച്ചതിന് ഭർത്താവ് പ്രശാന്ത് നായർക്ക് നന്ദി എന്ന തലക്കെട്ടോടെയാണ് ലെന ചിത്രങ്ങൾ പങ്കുവച്ചിരിക്കുന്നത്.
ഇന്നലെയാണ് ഇന്ത്യക്കാരനായ ശുഭാംശു ശുക്ല ഉൾപ്പെടെ നാല് ബഹിരാകാശ സഞ്ചാരികളെ വഹിച്ച ഡ്രാഗൺ ബഹിരാകാശ പേടകവുമായി സ്‌പേസ് എക്‌സിന്റെ ഫാൽക്കൺ - 9 പറന്നുയർന്നത്. ലെനയുടെ ഭർത്താവ് പ്രശാന്ത് ബാലകൃഷ്‌ണൻ നായർ ആക്‌സിയം -4 ദൗത്യത്തിന്റെ ബാക്കപ്പ് പൈലറ്റ് ആയിരുന്നു. ഏതെങ്കിലും സാഹചര്യത്തിൽ ശുഭാംശു ശുക്ലയ്‌ക്ക് പിന്മാറേണ്ടിവന്നാൽ പ്രശാന്ത് പകരം പോകാനാണ് നിശ്ചയിച്ചിരുന്നത്. സ്വകാര്യ ബഹിരാകാശ കമ്പനിയായ ആക്‌സിയം സ്‌പേസിൽ ഇരുവരും പരിശീലനത്തിന് എത്തിയിരുന്നു.
ബുധനാഴ്‌ച വിക്ഷേപണം പൂർത്തിയാക്കുന്നതുവരെ ഫ്ലോറിഡയിലെ കെന്നഡി സ്‌പേസ് സെന്ററിൽ പ്രശാന്തും ഉണ്ടായിരുന്നു. അവിടെ നിന്നും അദ്ദേഹം ചിത്രീകരിച്ച വീഡിയോ ലെന കഴിഞ്ഞ ദിവസം ഇൻസ്റ്റഗ്രാമിൽ പങ്കുവച്ചിരുന്നു.
2024 ജനുവരി 17നാണ് ലെനയും പ്രശാന്തും വിവാഹിതരായത്. ഇക്കാര്യം ലെന തന്നെയാണ് പുറത്തുവിട്ടത്. ഗഗൻയാൻ ബഹിരാകാശയാത്രാ സംഘത്തിലെ എയർഫോഴ്‌സ് ഗ്രൂപ്പ് ക്യാപ്‌റ്റൻ ആണ് തന്റെ വരനെന്നും ബഹിരാകാശ യാത്രികരെ പ്രഖ്യാപിച്ചതിന് ശേഷം ഈ വിവരം പുറത്തറിയിക്കാന്‍ കാത്തിരിക്കുകയായിരുന്നെന്നും വ്യക്തമാക്കിക്കൊണ്ടാണ് സോഷ്യല്‍ മീഡിയയിലൂടെ നടി വിവരം പങ്കുവച്ചത്.