ന്യായവിലയ്ക്ക് ഗുണമേന്മയുള്ള ഇറച്ചി; ഈ ജില്ലയില്‍ അഞ്ച് ഔട്ട്‌ലെറ്റുകള്‍ വരുന്നു
ആലപ്പുഴ: ന്യായവിലയ്ക്ക് ഗുണമേന്മയുള്ള കോഴിയിറച്ചി ലഭ്യമാക്കുന്ന കേരളചിക്കന്റെ ഔട്ട്‌ലെറ്റുകള്‍ ആലപ്പുഴയിലെത്തുന്നു. ആദ്യഘട്ടത്തില്‍ അഞ്ച് ഔട്ട്‌ലെറ്റുകളാണ് ആരംഭിക്കുന്നത്. ഇതിനായി അപേക്ഷ ക്ഷണിച്ചുതുടങ്ങി. ഹരിപ്പാട്, ചേര്‍ത്തല, കായംകുളം എന്നിവിടങ്ങളില്‍ നിന്ന് അപേക്ഷകള്‍ ലഭിച്ചുതുടങ്ങിയിട്ടുണ്ട്. ഫ്രോസണ്‍, ചില്‍ഡ് ഉത്പന്നങ്ങള്‍, ലൈവ് ചിക്കന്‍ എന്നിവ ഔട്ട്‌ലെറ്റുകളില്‍ നിന്ന് ലഭിക്കും. മലപ്പുറം, തൃശൂര്‍, എറണാകുളം, കോട്ടയം, പത്തനംതിട്ട, കൊല്ലം, തിരുവനന്തപുരം എന്നീ ജില്ലകളിലാണ് ഇപ്പോള്‍ കേരളചിക്കന്റെ ഔട്ട്‌ലെറ്റുകളുള്ളത്. ജില്ലയില്‍ കാര്‍ത്തികപ്പള്ളി, കായംകുളം, ചേര്‍ത്തല എന്നിവിടങ്ങളിലായി 12 ഫാമുകള്‍ കേരളചിക്കനുണ്ട്. പുതിയവയ്ക്കായി അപേക്ഷ ക്ഷണിച്ചിട്ടുണ്ട്. മറ്റുഫാമുകള്‍ നടത്തുന്ന കുടുംബശ്രീ അംഗങ്ങള്‍ക്ക് അപേക്ഷിക്കാം. 386 കോടിയുടെ വിറ്റുവരവാണ് കേരളചിക്കനുള്ളത്.
ചില്‍ഡ് ഉത്പന്നങ്ങള്‍ക്കായിരിക്കും ആലപ്പുഴയിലെ ഔട്ട്‌ലെറ്റുകളില്‍ പ്രാധാന്യം നല്‍കുക. അഞ്ചുദിവസം വരെ കേടുകൂടാതെ ഉപയോഗിക്കാന്‍ കഴിയുന്നവയാണ് ഇവ.
ചില്‍ഡ് ഉത്പന്നങ്ങള്‍ക്ക് പ്രാധാന്യം
1. പക്ഷിപ്പനി കൂടുതല്‍ റിപ്പോര്‍ട്ട് ചെയ്യുന്ന ജില്ലയെന്ന നിലയില്‍ ചില്‍ഡ് ഉത്പന്നങ്ങള്‍ക്ക് പ്രാധാന്യം നല്‍കും
2. പക്ഷിപ്പനി റിപ്പോര്‍ട്ട് ചെയ്താല്‍ മാസങ്ങള്‍ വരെ ചിക്കന്‍ ഉത്പന്നങ്ങള്‍ക്ക് ജില്ലയില്‍ നിരോധനം ഏര്‍പ്പെടുത്താറുണ്ട്
3. ഫ്രോസണ്‍ ഉത്പന്നങ്ങള്‍ കൂടുതലായി എത്തിച്ചാല്‍ ഇവ വില്പന നടത്താനാകാത്ത സാഹചര്യമുണ്ടാകും
4. ഇത് ഒഴിവാക്കാനാണ് ചില്‍ഡ് ഉത്പന്നങ്ങള്‍ക്ക് മുന്‍തൂക്കം നല്‍കുന്നത്. ഔട്ട്‌ലെറ്റുകള്‍ വരുന്നതോടെ ജോലി സാദ്ധ്യതകളും ഉണ്ടാകും
ചില്‍ഡ് ഉത്പന്നങ്ങള്‍
ചിക്കന്‍ ഡ്രം സ്റ്റിക്സ്
ബോണ്‍ലെസ് ബ്രസ്റ്റ്
ചിക്കന്‍ ബിരിയാണി കട്ട്
ചിക്കന്‍ കറിക്കട്ട്
ഫുള്‍ ചിക്കന്‍
ഔട്ട്‌ലെറ്റുകള്‍
തുടക്കത്തില്‍ : 5
ലക്ഷ്യം : 12
ആലപ്പുഴയില്‍ കേരളചിക്കന്‍ ഔട്ട്‌ലെറ്റുകള്‍ ആരംഭിക്കുന്നതിന് നല്ല പ്രതികരണമാണ് ലഭിക്കുന്നത്. അധികം താമസമില്ലാതെ ഔട്ട്‌ലെറ്റുകള്‍ ആരംഭിക്കും
-എസ്. അഗിന്‍, മാര്‍ക്കറ്റിംഗ് മാനേജര്‍, കേരളചിക്കന്‍