മുഖ്യമന്ത്രി ചികിത്സയ്ക്കായി അമേരിക്കയ്ക്ക് തിരിച്ചു

തിരുവനന്തപുരം: മുഖ്യമന്ത്രി പിണറായി വിജയൻ ചികിത്സയ്ക്ക് അമേരിക്കയിലേക്ക് തിരിച്ചു. ഇന്നലെ പുലർച്ചെ മൂന്നു മണിക്ക് തിരുവനന്തപുരം വിമാന താവളത്തിൽ നിന്നാണ് പുറപ്പെട്ടത്. ദുബായ് വഴിയാണ് യാത്ര. ഭാര്യ കമലയും അനുഗമിക്കുന്നുണ്ട്. അമേരിക്കയിലെ മയോ ക്ലിനിക്കിലാണ് ചികിത്സ തേടുന്നത്.
2018 ൽ ആയിരുന്നു ചികിൽസയ്ക്കായി ആദ്യം അമേരിക്കയിൽ പോയത്. തുടർചികിത്സയ്ക്കാണ് ഈ യാത്ര. ആരോഗ്യവിവരം വെളിപ്പെടുത്തിയിട്ടില്ല.കൂടെ പോകുന്നവരുടെ വിവരങ്ങളും വ്യക്തമാക്കിയിട്ടില്ല. പുലർച്ചെ ഉൻമേഷവാനായാണ് മുഖ്യമന്ത്രി വിമാനത്താവളത്തിലെത്തിയത്. ലോഞ്ചിലെത്തിയ മുഖ്യമന്ത്രിയെ കണ്ട ഒരു കുട്ടി ഗുഡ്മോണിംഗ് ആശംസിച്ചു.ചിരിച്ചുകൊണ്ട് അദ്ദേഹം തിരിച്ചും ആശംസ നേർന്നു. പത്തുദിവസം കഴിഞ്ഞ് തിരിച്ചെത്തുമെന്നാണ് അറിയുന്നത്.